ZALEN, Aug. 18, 2026: Mizo mai ni lo, India hockey star lar, Lalremsiami Hmar Zote chu ram chhunga infiam mite chawimawina sang, Arjuna Award 2025 dawng tura thlan a ni a. Mizo infiam mi zinga he chawimawina dawng hmasa ber a ni dawn.

Netherlands-a FIH Women’s World Cup 2026-a ram aiawha feh chhuak mek, Kolasib nula rual hian infiam mi dang 16-in India-a infiam mite chawimawina sang ber dawttu hi an dawng dawn a ni.

Siami’n chawimawina a dawng dawn tih hi Thawhlehni khan union youth affairs & sports ministry-in a puang a, President Droupati Murmu-i’n Rashtrapati Bhavan-ah a hlan dawn a. Chawimawina hian Rs. nuai 15 pawisa fai a keng tel.

Arjuna Award dawng tur puanah kum 26 mi, Siami a tel tih hriat a nih rual hian Mizoramah pawh titi a luah nghal a, Chief Minister Lalduhoma pawhin a lawmpui thu sawiin, “Ka chhuang em em a ni,” a ti.

A Instagram account-ah Lalduhoma hian, “Lalremsiami hi Mizo nula Olympian kan neih chhun a ni a, India ram tan hlawhtlinna tam tak a lo chang tawh a. He chawimawina ropui tak pawh hi Mizo zinga a dawng thei hmasa ber a ni dawn a ni,” tiin Mizo tawngin a tar lang.

Saptawngin Siami chu Mizoram tihmingthatu leh Indian hockey tan a thawhrimna, a tawrhchhelna leh a hlawhtlinna hmanga tha tam tak thawhtu a nih thu a ziak bawk.

Mizoram Sports Minister Lalnghinglova (Tetea) Hmar pawhin chawimawina dawng tura Siami a tel chu lawmawm a tiin a chhuan tak zet thu a IG account-ah a tar lang.

“Mizoram mai ni lo, India tihmingthatu, Siami thinlung takin kan chhuang a. A thawhrimna, inpekna leh tumruhna te nen dinhmun sang zawk thleng zel turin duhsakna sang ber ka hlan,” a ti bawk.

Arjuna Award dawng tur hian kum li liam ta chhunga chet that, hruaitu tha nih leh inthununna nei tha nih a ngai.

Siami hi kum 2017 khan Indian Indian Women’s Hockey Team-ah a tel tan a, tun thlengin player pawimawh ber zinga mi a ni a. Ram tan hian vawi 187 khel tawhin goal 46 a thun tawh.

Indian nulaten Tokyo 2020 Olympics-a palina an nih tum khan thawhhlawk ber pakhat a ni a. World Cup, Asian Games leh Asian Champions Trophy hrang hrangah ram tan a feh chhuak tawh.

2018 Asian Games-a silver medal, 2022 Asian Games-a bronze leh 2023 leh 2024-a Asian Champions Trophy-a gold medal dawngtu India team-ah pawh a tel.

Hei bakah hian Women’s Asia Cup 2017-a gold medal leh FIH Hockey Nations Cup 2022 leh 2026-a gold medal an lakah pawh a thawhhlawk ber pawl a ni bawk.

Siami hi kum 11 lek a nih laia Mizoram sorkarin Thenzawla hockey academy-a inzir tura a thlan chhuah atanga hockey nun bul tan tak tak niin kum 2016 khan New Delhi-a National Hockey Academy-a inzir belh turin a kal zui a. A tirah chuan Hindi a thiam loh avangin hrehawm pawh a ti thin a, tawng hi a khelhpuite atanga thiam hret hretin tunah erawh chuan eng harsatna mah a nei tawh lo.

India senior team-a a tel hma, kum 2016 khan Under 18 team-ah telin Asia Cup-ah bronze medal a lakpui a, a hnu kumah senior team-a tel tura koh zui a ni ta a ni.

Arjuna Award 2025 dawng tur hian mipa hockey star Raj Kumar Pal pawh telin Hockey India chuan an pahnih hian ram chhunga chawimawina ngaihhlut an dawng tur an lawmpui thu an sawi a, Indian hockey tan hlawk taka tha thawhtu ni zel turin duhsakna an hlan.

Arjuna Award hi sorkarin Indian infiam mite chawimawina a pek theih dang ber dawt niin a chungah hian Khel Ratna a awm a ni.