ZALEN January 16, 2025 : India rama State leh Union Territory zawng zawng Thirsakawra fang chhuak rang ber record siamtu Vanlallawmzuala Varte (Lz Varte), Mission Veng hnenah vawiin khan India Book of Record hlanna leh lawmna hun hman a ni.

'Ride to Clean Air' tih thupuia hmanga Boruak chhe mek laka invenna dan tur leh hmalak dan tur auchhuahpuia India ram hmun hrang hrang fangchhuak Lz Varte hi India Book of Record aiawhin Tapan Datta chuan record hlanna hun a hmang. Lz Varte hi Mizo zinga India Book of Record-a lakluh hmasakber a ni.

Lz Varte hi he hunah hian Khawvela Paragliding Pilot naupang bera International Book of Records in, 'Youngest Certified Paragliding Pilot' nihna an pek Samuel Lalbiakhlua, Saitual pawhin a tawiawm a ni.

Lza sulhnu thenkhat :

• 2013 - Lunglei trekking & Siaha Cycling.

• 2015 - Champhai Tlangdung, Cleanliness Campaign.

• 2021 - Mizoram hmar tawp atangin chhim tawp Cycle in a rap thleng a, Three Country Point a thleng.

• 2021 - Mariana Trenching, (10,971 m) cycle in 200kms, elevation gain 11034 m turah 12181 m a tlan.

• 2021 - 24hrs Cycling - 330 kms, Tuirial Airfield hel kual.

• 2022 - 24hrs trekking 100 kms (mu lovin), In atyangin Rengte Tlang Sang thleng.

• 2023 - Mizoram hmar tawp atangin chhim tawp ke in a kal thleng leh bawk a, hetah hian kawngsir plastic bur ruak leh tawihtheilo thil eina kawr a chhar tluanchhuak zak a ni.

India rama state zawng zawng leh UT a tlawh kim vek nan hian Km. 17,045 vel a in rap kal a, Ni 285 a thang a ni. Nikhata a tlan thui ber chu Km 207.82. a ni a, Lucknow atanga Badlapui, UP kalkawnga a tlanna a ni a. A tlan chak ber West Bengal, Kurseong atanga Darjeeling a ni a, darkar khata Km. 68.8 tlan ang a ni.

January 2024 khan km 500 vel chauh a tlan hman a, February– April, 2024 khan km 2000 chuang thla tin khalh a ni a, May-November, 2024 kha chuan thla tin chawhrualin Km. 1278 vel tlan ang a ni tawh a.

Vanlallawmzuala record hlanna leh lawmna hun hi Dr. Malsawmkima chuan a kaihruai a, Upa Zonunmawia chuan hunserh a hmang a, Technical report Prof. Zodinpuia Pachuau hnen atanga ngaihthlan niin, Lz Varte hian a zinkawng chanchin a sawi a, a pa VL Chhuanawma chuan lawmthu a sawi.