ZALEN, September 17, 2025: India rama zina in sang tha bera inchhal, Jawaharlal Nehru University (JNU)-a Mizo zinga zirlai pawl hruaitu ni thei hmasa ber, Dr. C. Lalengkima lehkhabu, ‘Lal Salaam’ chu Thawhlehni chawhnu khan Home Minister K. Sapdanga’n a tlangzarh.

Govt. Aizawl College (GAC) Conference Hall-a tlangzarhnaah hian home minister chuan inkhawma tel zirlaite fuihin India-a sorkar hna sang- IAS, IPS leh a dangte thawk thei tura tan laa inhumsek turin a ngen.

Lehkhabu thlir lawktu, Laldinpuia Tlau, Chief Judicial Magistrate (CJM), Aizawl chuan Lal Salaam chu lehkhabu chhiar nahawm tak Mizote tan pawha hlu tak chanchin chuanna a nih thu a sawi.

Lal Salaam hi tuna GAC-a olitical zirtir hna thawk mek, Dr. Engkima lehkhabu hmasa ber a ni a. Kum 2006-07 chhunga JNU-a zirlai hruaitu (councillor) ni tura a bei dan leh a nih chhunga a thil tawn leh zirlaite zinga politics leh a behbawmte tar lanna a ni.

Dr. Engkima hian Delhi University hnuaia ARSD College-ah BA (Hons.) Political Science a zawh hnuin JNU atang hian MA, M.Phil leh Ph.D a zo leh a ni.

Tlangzarhnaa a thianten an sawi dan chuan mi hrat tak a ni a, pawl riat pawh fail, pawl dangah pawh hlawhchham fo a nih thu an sawi a. Amah pawhin a doctorate degree chu miin kum thum kum lia an zawh thin laiin ani chuan kum 15 zet, tlangval a nih laia a tan chu fa pahnih a neih hnuah a nei thei chauh tih a sawi bawk.

‘Lal Salaam’ tih hi zirlai hruaitu a nih laia a telna, Communist zirtirna vuahtu left inchibaina, ‘Hnehna chibai’ tihna a ni.