Aizawl January 19, 2023: State Task Force Committee for Immunization chuan January 1, 2023 atanga kalpui mek zenghri danna - fIPV (fraction Inactivated Polio VaccinE) te, December 2023 ral hma a sentut natna ti rem tura hmalakna kalpui dan tur te, chhulhmawr cancer venna - Human Papilloma Virus Vaccine pek chhuah dan tur leh Vaccine dang la te chhinchhiahna tur U-WIN platform kalpui chhin dan tur te rel a ni.

Committee hi Chairman Esther Lalruatkimi IRS, Principal Secretary, Health & Family Welfare Department hovin a office ah an thu khawm a. Natna hrang hrang laka invenna, Immunization programme kalpui mek te leh Mizoram dinhmun te, programme thar kalpui leh turte nen an thlir ho va. Heng zingah hian kumin 2023 January ni 1 atanga kalpui mek zenghri danna, fIPV(fraction Inactivated Polio VaccinE) te; December 2023 ral hma a sentut natna, Measles Rubella tirem tura sawrkar laipui hmalakna kalpui dan tur te; hmeichhe tam tak natna leh thihna thlen thintu chhulhmawr cancer venna, Human Papilloma Virus Vaccine pek chhuah dan tur leh Covid Vaccine bakah Vaccine dang la te chhinchhiahna tur U-WIN platform Aizawl leh Lawngtlai district a kalpui chhin dan tur te an sawiho.

Khawvel-ah India ram hi hmeichhe chhul-hmawr cancer tamna ber pahnihna a ni a. Chhul-hmawr cancer tam ber hi Human Papilloma Virus vang tih hmuh chhuah a ni a, hei hi vaccine hmanga ven theih leh za zela 99.9% a veng niin hriat a ni. India sawrkar chuan kum 2023-24 atang hian hmeichhe naupang/tleirawl kum 9 atanga kum 14 inkar tan Vaccine hi a thlawnin a pe dawn a. He vaccine single dose kalpui hmasakna tur state 7 thlan chhuah zingah Mizoram chu telin Health & Family Welfare Department chuan mi sing 6 vel tinzawnin ruahmanna kalpui tum a ni.

State Task Force Committee Chairman chuan natna laka invenna tur Immunization Programme te chu Mizoram tan leh thangthar lo awm leh turte tan a pawimawhna sawiin Immunization programme chu hlawthling taka kalpui turin Health & Family Welfare departmentin mal khai chi a ni lo, a ti a. Department te nena thawh hona tha neih thu sawiin hemi kawngah hian State Task Force Committee a tel Education Department te, Women & Child Development leh Information &Public Relations Department te bakah MHIP te chu thahnemngai taka hma lakpui turin a sawm a ni.

Kum 2014 atang khan India hi zenghri laka fihlim tawha puan a ni chungin thenawm ram atanga natna hri lo lut thei a nih avangin Polio vaccine hi chhunzawm zel a ni a. Ministry of Health & Family Welfare thu chhuah angin January 1 atang khan India ram pumah fIPV hi dose 3 a pek tan a ni tawh a. Naupangin thla 9 a tlinin fIPV hi Sentut venna (Measles Rubella Vaccine) lak rualin pek tur a ni. Dose 3 lakin zenghri lakah za a 98% a veng tura ngaih a ni.

Prime Minister Narendra Modi chuan December 2023-ah India rama Sentut natna, Measles Rubella tirem turin a tiam tawh a,  state tinah he natna laka invenna vaccine hi district tinah naupang za zela 95% hnenah 1st leh 2nd dose pek vek tur a ni a. Naupang kum 5 la pumhlum lo ten vaccine hi dose 2 an la tur a ni.