Aizawl May 27, 2024 : BJP Mizoram State chuan vawiin khan an Office, Mipui Run, Upper Republic ah Karthar Inhlanna leh Political Session an nei a, he huna thusawitu Vanlalhmuaka State President chuan, "Mizorama Kristiante kan chep hun lai ber chu Congress Party-in India Ram an kaihhruai hunlai a ni," a ti.

Hmuaka chuan, "Tunlai hian History kan chhiar peih ta lova, nimahsela History hi kan chhut let fo angai a, Kan ram leh kan hnam kan sakhua a him loh lai ber chu India rama Congress Party chak vanglai ber, Pi Indira Ghandhi hunlai kha a ni a, Mizoram chu khang hunlai khan Assam State hnuaia District pakhat ve chauh kan la niin, Dawhkan kila sawifel theih mai tur anih lai a, Kum 1966 March 5 a Jet Fighter hmanga min rawn Bomb ta kha Mizo mipui te hian kan theihnghilh mai mai dawn lova, State pawh kan nih hma a, hmelma ram beih a, ralpui phiar taka min bei kha rilru a na thin a ni."

"Khang avanga mahni in lum pawh luah theilo leh khaw khawm hial ngaia Ran ang maia khalh khawm kan ni te kha a rapthlak hle a, kan hmeichhia ten nasa takin Pawngsual an tawk a. Chu mai ni lovin, kan Sakhaw Biak In pawh min zah sak lova, Biak In chhungah Zu te an in a, inkhawm pawh kan duh hun hunah kan nei thei lo a nih kha. Chuvangin Mizo Kristian te'n tihduhdah kan tawrh nasat hunlai dik tak hi kan hriat chian a, kan ngaihtuahna kan sen a ngai a ni, chuvangin Mizoram hi tu Party in nge min duhsaka min nghaisa thin tih hi kan enlet fo a ngai a ni," a ti.

BJP State President chuan sawi chhunzawmin, "Mizoram hi Zofate Jerusalem kan ti thin a, nimahsela tun di hmunah chuan Mizo te Jerusalem-ah hian tam a tla tlat a, kan unau ramdanga awm ten harsatna an tawh chang a lo tlan khawm an awm chang pawhin Central ah kut dawh a ngai nghal thin. Chutiang ni lova, Mizoram hi Zofate Jerusalem tak tak tur atana buatsaih hi BJP Mizoram chuan kan tum a ni a, 'Mizoram First' tih hi kan thupui ber a ni a, Mizoram hi kan intodelh hunah kan Unaute pawh lo mikhual a, duat taka lo enkawl thei turin Pathianin min buatsaih ngei dawn a ni tih hi kan ring a ni."

"Mizoram hian tawngka chauha hmangaihtu a nei tam ta a, a taka hmangaiha mahni kea ding thei tur buatsaihtu tak tak erawh a la neih loh avangin vawiin ah pawh heti zawng mai hi kan thlen chin a ni ta a ni. Chuvangin BJP chuan 'Mizoram First' kan tih angin Mizoram intodelhna tur atana kan hmachhawp leh Manifesto tihpuitlin hi kan tum ber a ni a, heng kan hmalakna tur atana hmachhawp kan neihte atang hian Mizoram intodelhna kawng hi a inhawng lian hle a ni, State dangte hmasawnna kan hmuh fo ang hi kan kawtkai ngeia kan hmuh ve hun hi a nghahhlelhawm hle a ni," a ti bawk.