ZALEN Nov. 7, 2024; Mizoram a tomato thar hnem ber, Tualte khua leh khaw danga tomato thar te chu a hralh chhuahna lamah harsatna a awm mek a, a thartu lam ten kg. ah Rs. 10 a hralh mai pawh an hnial tawh lo.

Tualte khua atanga ZALEN thudawn danin, an khua bikin kuminah tomato quintal 12,000 vel thar an inbeisei a, a thar hun hian nakum January/February vel thleng a awh phak an ring.

Tualte khua bakah Mizoram khaw hrang hranga tomato thar chhuahte chu a thartu ten tunlaiin a hralhna kawngah harsatna an tawk nasa hle a, a chhiat mai hlauhthawnawm a nih theih avangin kg. ah Rs. 10 a hralh mai pawh an hnial tawh lo niin an sawi.

Hetianga tomato chingtuten a hralhna lama harsatna an tawh nachhan hi Mizoram hmun hrang hrangah thar chhuah a tam vang a ni deuh ber tih thudawnna chuan sawi bawkin, a hralh chhuahna kawngah Horticulture department lam pawhin theihtawp an chhuahpui niin a sawi.

Thudawnna chuan a thartute tan kg. ah Rs. 50 a an hralhin hlawh an nei-ah an ngai tih a sawi a, chumi aia a tlawmin an hloh (loss) ah an inngai tih a sawi. Mizoram a tomato thar chhuah hrang te hi Aizawl bakah Mizoram hmun hrang hrangah hralh thin a ni.