Aizawl March 10, 2025 : Tourism minister Lalrinpuiin Mizoram-ah 5 star hotel a awm theihna turin hma an la tih a sawi. Hetihlai hian kum kal mek 2023-24 chhung a Mizoram tlawhtu khualzin awm zat chu mi 1,54,916 an tling tawh.

Assembly budget session neih meka a department chan sawihona hmawr a bawkna ah thusawiin, tourism minister chuan, Mizoramin khawmpui lian a thlen changin khualzin thlenna turah harsatna a awm thin tih a sawi a, chumi avang chuan 5 star hotel din turin hma an lak thu leh chumi chungchang chu CM te nen sawiho a la ngaih tur thu a sawi.

Tourism minister chuan Mizoram ah tourism tihmasawn turin ruahmanna hrang hrang an nei tih sawi bawkin, MLA tin te chu an bial chhung theuh ah tourist village thlang tura ngen an nih tawh thu te a sawi.

Rampawn khualzin ten mumal zawk leh ruahmanna tha zawk a Mizoram an tlawh theihna turin event calendar siam a nih dawn thu te leh tourist vehicle scheme pawh buaipui mek a nih thu a sawi. "Tourist ten an rawn sawisel ber thin chu tourist vehicle scheme kan nei lo hi a ni," Tourism minister chuan a ti bawk.

Tourism minister tarlan danin, kum kal mek 2023-24 (December) thleng Mizoram tlawhtu khualzin awm dan chu Domestic tourist 1,52,413 leh foreign tourist mi 2,503, an vaiin 1,54,916 an ni.