Aizawl April 28, 2024 : Kum liam ta, 2023-24 (April-February) chhung khan Mizoram tlawhtu khualzin 1,96,880 an awm a, chung zinga mi 3,435-te chu ram pawn atanga kal (foreign tourist) an ni a. Ram pawn atanga Mizoram tlawhtu zingah USA atanga kal an tam ber.

Tourism department tar lan danin 2023-24 chhunga Mizoram tlawhtu khualzin tam berte chu ram chhung atanga kal (domestic tourist) an ni a, mi 1,93,445 an tling a. May, 2023-ah khualzin an tam ber a, 21,349-te chu ram chhung atanga kal niin ram pawn atanga kal mi 347 an awm.

Kum 2022-23 chhunga Mizoram tlawhtu khualzin zawng zawng zat chu 2,22,008 an tling a, chung zinga mi 2,18,457-te chu ram chhung khualzin niin, mi dang 3,551-te chu ram pawn khualzin an ni.

Ram pawn atanga Mizoram tlawhtu khualzin zingah USA atanga kal khualzin an tam ber a, 2023-23 (April - Feb) chhungin mi 1,162 an awm a. Japan, Australia, Israel, Canada, UK leh ram dang atanga tlawhtu khualzin an awm bawk.

Hetihlai hian Mizoram sawrkara tourism department-in a pawm ‘tour guide’ mi 89 an awm tawh a, chung mite chu khawpui bakah thingtlang hmun hrang hranga mite an ni.

Mizoram tlawhtu khualzin

Kum      Ram chhung  Ram pawn   Total

2018-19    88,122    1,644    89,766

2019-20    1,59,534    2,143    1,61,677

2020-21    20,474    90    20,564

2021-22    1,32,099    517    1,32,616

2022-23    2,18,457    3,551    2,22,008

2023-24    1,93,445    3,435    1,96,880