ZALEN September 7, 2026: India ramin kum tina hman thin, mamawhtute hnena a thlawna mit pek leh hemi chungchanga inzirtirna ni "Eye Donation Fortnight" vawi 41-na chu vawiin khan Taxation Department Auditorium, MINECO-ah hman a ni a. He hunah hian Mit pe (Eye Donation) tura in register mi 9345 awm tawh tih report a ni

Vawiina Eye Donation Fortnight puala hun buatsaih hi National Programme for Blindness & Visual Impairment, NHM bultuma neih a ni a. Dr. R. Lalchhuanawma, Mission Director NHM in kaihruaiin 

Dr. Lalthlengliani, Principal Director, H&FW Dept. chu Khuallian a ni.

Chairman Dr. R. Lalchhuanawma chuan Aizawl Civil Hospital-a Eye Bank hi kum 2008, July 31-ah hawn niin, hemi ni atanga ni 27.8.2026 thlenga thih hnua mit donate (Mit pe) tum in register tawh mi 9312 an awm tawh a. Mit dawng tur mit thlak ngai in register hi mi 400 an awm tawh bawk. Tun thleng hian thih hnua mit pe tawh hi mi 632 an ni. Kumin National Fortnight on Eye Donation hun chhunga mit donate phal, pledge chhang zawng zawng nen chuan mi (9312+33) 9345 an awm tawh a, mit donate, pledge chhang duh hi mi 20 chin an awm chuan a hmunah thawktu ten an pan thei reng a ni. Hrechiang duh tan 03892324564 (Toll Free) ah hian zawh chian theih reng thu a sawi bawk. 

Khuallian Dr. Lalthlengliani chuan Eye donation chu thih hnu atana mitdarthlalang (Cornea) phal taka pek hi a ni a. Mit pek chu Eye Bank team in rang takin mitthi awmna hmun atang chuan an la thin. Eye bank ah hian Cornea (Mit Darthlalang) chu dah that theih a ni a ti. Eye Bank hmasa ber hi kum 1940 khan New York (USA) ah din a ni a, Mit pe tura intiam hmasa ber chu Dr. Paton niin India ramah pawh 1943-ah Eye bank hi nei tan a ni a, Eye donation hmanga Corneal transplant (Mit Thlak) hmasa ber chu kum 1960-ah Indore (MP) ah neih a nih thu a sawi bawk. 

Mizoram-ah hian July 31, 2008-ah Eye Bank hawn niin a kum leh September 25, 2009-ah Eye Donation hmangin Civil Hospital mit Doctor leh Sri Sankaradeva Nethralaya, Guwahati ten nen tang kawpin 1st Corneal Transplant tih a lo ni ta a. Mizoram Eye Bank hi Eye Bank Asociation of India member niin Transplantation of Human Organ Act, 2011 hnuaia register fel thlap a nih thu a sawi. 

Eye Donation lo hlawhtlinna atan hian Central Sawrkarin ruahmanna siamin kum tinin Eye Donation Fortnight (25th August to 8th September) hman thin a ni a, hemi chhung hian nasa lehzualin hma lak thin a ni a ti a. Mizoramin Eye Bank a nei ve ta a, he kan Eye Bank neihchhun hian mi inphalte inpekna lo chuan hna a thawk theilo a, Mit Donate-phal an awm a ngai a ni. 

Tun dinhmun ah Mizoram Eye Bank a mit thlak ngai in register te hi mi 400 an awm a, Civil Hospital in mit Transplant an tih tawh hi mi 99 an ni a, waiting list, koh nghak mek hi mi engemaw zat an awm bawk. Synod Hospital, Durtlang hi Eye Donation Centre niin, mit thlak ngai te pawh an thlak thei tawh a, an thlak nual tawh bawk. Eye Care Hospital-ah pawh mit thlak thin a nih thu leh hemi bak ah hian cornea hi SSN, Guwahati ah thawn thin niin Mizoram atangin a hmangtu tur ten an um thla mai thin bawk a ti.

He programme hmang tura sawm Govt. Higher Secondary School leh MICE school naupang lo kal te atangin Mit donate tura pledge chhang mi 33 an awm. Anni school pahnih Class XI zirlaite tan Eye Donation chungchangah Slogan writing competition buatsaih a ni bawk. Kum 2025 - 26 chhunga mit pe mi 67 chhungte hnenah chawimawina thuziak (Certificate) sem chhuah a ni bawk. Kum 2026 – 27 July thla thlengin Cornea hi 42 lak ni tawhin mit darthlalang (Cornea) 23 thlak sak an ni tawh bawk.