— Lianhmingthanga, Chaltlang Zalen Chanchinbu Pathianni, ni 22.3.2015 chhuak phek 2-naa ‘Mizorama Dak In hmasaber Tlabung Post Office’ tih thupui hmanga i rawn chhuah kha ka lo chhiar ve a. Paragraph 2-naa ‘Mizorama Dak in hmasa ber Tlabung Post Office hi thawm that tuma hmalak a ni a, thawm that a nih loh nan Dak In hnathawk leh ram rohlu humhalhtu pawl INTACH, Mizoram Chapter-te ngenna angin tun thlengin mingo din angin hmuh theih a la ni’ tih lai kha han sawi zau deuh a ngaiin ka hria. A chhan chu hnam rohlu, heritage leh monument thenkhat chu a pawimawhna hriat loh vanga tihchhiat leh tihdanglam a awm nual laiin thenkhat chu humhalh that kan tum luatah a tira a pianhmang, original condition tihchhiat an ni nual a. Chuvang chuan kan built heritage-te pawh hi a vawn that leh humhalh kawngah fimkhur a ngai hle a ni. Tlabung Dak In, Post Office Building-te phei hi chu kan built heritage zingah a upa leh chhuanawm ber a ni awm e . Kum 2011 khan INTACH Mizoram Chapter-te chuan an va tlawh a, a vawn that leh humhalh dan tur chungchangah pawh Tlabung YMA leh NGO pawl hrang hrangte nen uluk taka hmalak dan tur sawiho a ni . He Post Office hi kum 1872-a British sipai Maj. T.H.Lewin, Chittagong Hill Tracts Deputy Commissioner a nih lai 1872-a a sak a ni a. A hmanruate hi Tlabung khua leh a chhehvel thing leh mau hman an ni a, a chung leh a skating-te rangva (corrugated iron sheet) hman a ni . He Post Office Building hi a rei tawh avangin siam that ngai tak pawh a ni. Chuvang chuan, INTACH Mizoram Chapter chuan Post Office hotute Central leh Shillong lama mite a dawr reng a. Kum thum kal ta khan Post Office lam thuneituten a building hi thiaha concrete building-a sak an tum a. Mahse, INTACH Mizoram Chapter ten Mizoram mai pawh ni lo, India ram tan pawha heritage pawimawh a nih thu sawiin thiat lo turin an ngen a. Chu an ngenna avang chuan an thiat ta lo va. Kan hriat angin India ramah Post Office-te hi sawrkar hnathawk pawl (Organization) pawimawh leh hmasa a nih avangin hmun dangah pawh heritage atana pawimawh In hlui an nei tam a. Chuvang chuan, he Tlabung Post Office Building pawh hi heritage atana pawimawhna a neih hriain an thiat ta lo a ni. Tichuan, INTACH Mizoram Chapter chuan 9th February, 2015 khan Central-a Postal Department lu ber, Secretary and Chairman, Postal Service Board hnenah Tlabung Post Office hi thiat lova restore nan mi thiam leh sumpai dilna a thawn a, a hlawhtlin ngei pawh beisei a ni. Tlabung khua hi British hovin Mizoram awp tura an lo luhna hmasa a nih avangin sulhnu pawimawh tak tak a awm nual. Tlem han tar lang lawk teh ang. Tuna PWD-in Inspection Bungalow-a an hman tak an chei that tawh te, Police Station original building la dingte an awm a. Tin, tuipui kam sirah khuan Lunglei panna kawng an laih tan ni chhinchhiahna Oldham ‘lungker’ a awm a, historical landmark pawimawh a nih avangin Tlabung YMA leh Tribal Research Institute ten humhalhna an siam. Maj. T.H.Lewin memorial stone pawh langsar takin PWD Inspection Bungalow kawtah humhalhin a awm bawk. Tichuan, kan heritage pawimawh building chungchang sawi leh ta ila, ’thawm that tuma hmalak a ni a, thawm that a nih loh nan…’ tih lai tak chhiartuten an hriatthiam zawk nan ‘thawm that’ han tih hian repair-te a kawk bik deuh a. Chuvang chuan a sap tawng takin ‘restore’ tia sawi nise. Chutichuan, a originality paih lova sak that emaw siam that emaw a ni mai ang chu. Engpawh nise, Mizo tawng emaw, sap tawng emawa han sawi chian vak ngaihna a awmin ka hre lo va. Chuvang chuan, a chhiartuten a sap tawng takin ‘restore’ tia dah hian an hriat thiam mai ka ring. Tichuan, kan heritage In hlui neih chhun te thawm that an ngaih reng rengin a neitu, sawrkar emaw, Kohhran emaw, Mi mal emaw te hian ‘repair’ ngawt lovin a originality a neih zel theih nan ‘restore’ zawk thin sela tih hi INTACH Mizoram Chapter ngenna a ni. Chu chu INTACH leh Tlabung YMA te duh dan chu a ni. Tlabung Post Office Staff-te tlem hle mah se tha taka an enkawl avang leh rinawm taka an hna an thawh avangte leh Tlabung YMA leh NGO dang dangte pawhin vertherna awm lova an veng heritage-te an vawn that leh humhalh avangin INTACH Mizoram Chapter-te chuan an chungah lawmthu a sawi a. Kan heritage pawimawh, Tlabung Dak In chanchin a rawn chhuah avangin Zalen Chanchinbu Editor hnenah pawh INTACH Mizoram Chapter chuan lawmthu a han sawi e. Mizoram mipuite hian heritage pawimawhna awareness i nei zel ang u.