Aizawl: Mizoram State Aids Control Society (MSACS) chhinchhiah danin Mizorama HIV+ hmuhchhuah tawh zat chu mi 27,241 an ni a, chung zinga a tam ber, 22,774 (83.60%) chu thalai kum 15-49 inkar an ni a. HIV inkaichhawnna tam ber chu mipat hmeichhiatna niin thihpui mi 3,506 an awm tawh.

MSACS report thar bera a lan danin Mizorama HIV hrik pai hmuh hmasak ber, October, 1990 atanga kumin September thleng khan Mizoramah thisen endik 6,05,713 ni tawhin, HIV hrik pai mi 27,241 hmuhchhuah a ni tawh a, thisen endik zat atanga HIV hrik pai zat chu 4.11% a ni.

Kum kal mek 2022-23 (April - September) chhunga thisen endik 27,081 atangin HIV hri kai 1,185 (4.4%) hmuhchhuah a ni tawh a, raipuar 11,154 thisen endik zingah HIV hmuhchhuah mi 96 (0.9%) an awm.

Hetihlai hian kum liam ta, 2021-22 chhunga thisen endik 40,171 atanga HIV hrik pai hmuh chhuah zat chu 1,601 (4.0)%) a ni a, nau pai thisen endik 19,473 atanga HIV hrik pai hmuh chhuah zat chu 177 (0.9%) a ni.

MSACS chhinchhiah danin Mizoramah HIV/AIDS vanga thi mi 3,506 an awm tawh a, chung zinga mi 2,250 chu mipa niin, hmeichhia 1,187 an ni a, an zinga 69-te chu naupang an ni.

National AIDS Control Organisation (NACO)-in an zirchianna, India HIV Estimates, 2019 an tihchhuahah India rama kum 15-49 inkar HIV+ percent-ah Mizoram chu 1-na (2.32%) a ni a, 2-na chu Nagaland (1.45%) niin 3-na chu Manipur (1.18%) an ni.

Kum tin mi 1,000 zinga kai thar awm zatah pawh India ramah Mizoram chu 1-na niin, mi 1,000 zelah 1.18 (1.18 per 1,000 uninfected population)-in an kai a, 2-na Nagaland chu 0.73 an ni.

HIV kai hmuh chhuah zat
Year          Tested   +ve      %
2018-19    44649     2,557    5.7
2019-20    51,688    2,338    4.5
2020-21    38,867    1,900    4.9
2021-22    40,170    1,601    4.0
2022-23    27,081    1,185    4.4