Aizawl March 12, 2024: Vawiin khan Chief Minister Lalduhoma chuan Assembly House CM Recess Room-ah Mizoram College Teachers' Association hruaitute a kawm a. Mizoram Education Service siam tum a nih thu a lo hrilh.

Chief Minister hian an harsatna te a ngaihthlaksak a, sawrkarin Mizoram Education Service siam a tum thu leh an thil thlen te chu mithiam zawkte nena an lo zirchian tur thu a hrilh a ni.

MCTA hruaitute hian sawrkar thar chibai buk pahin an pawl khawmpuiin a lo rel tawh thil te an thlen a. Ram mamawh mila UGC dan ang thlapa zirtirtu lak (direct recruitment) zel tha an tih thu thlenin zirtirtu chi hrang tam lutuk chu tha lo va an hriat thu leh hei hian higher education quality a tichhia nia an ngaih thu an sawi.

College zirtirtu te chuan, "Kan thalai lehkhathiam ber ber ten college zirtirtu nih an chak loh phah deuh niin kan ngai a ni," tiin, an kaisanna thil te, an zinga senior deuh te department lama awm ve tha an tih thute, pension an tam avanga zirtirtu lak belh a tul thute leh thil dang te an an thlen bawk a ni.