Aizawl: Mizoram Forensic Science Laboratory (FSL) chuan police ten an man pawikhawihtu hrang hrangte kutze thla (fingerprint) 5,982 an nei/kawl tha tawh a, kumin January - November chhungin thubuai 1,082 khawihin heng atang hian finfiahna 23,959 zirchian an nei.

FSL-in tun thlenga kutze thla an neihte hi pawikhawihtu convict (thiam loh chantir) tawh mi, 3,373-te kutze thla leh pawikhawihtu an man tawh mi 2,609-te kutze thla a ni. 

Police leh excise department-ten thubuai endik tur an pek atangin kumin thla 11 chhungin thubuai 1,082 an endik tawh a, pawikhawihna a thlenin a hmuna endik turin FSL-a thawkte koh thin an ni. Kumin ah pawikhawihna thlenna hmun 80 ah kalin an endik tawh a, court-a thubuai an dinpui chu 211 a tling tawh.

FSL-a thawktute hi pawikhawihna hmun hrang hrangah kal kualin, finfiahna awm thei angte an lakhawm thin a, pawikhawihtute manchhuahna kawngah police kutke tangkai ber pakhat an ni.