-Mahmuaka Chhakchhuak -

Eden bawhchhiatna avangin leilungah hian inpawngnekin a khat zo ta tih hiala sawi a ni a, he leilunga cheng, ramsa leh nungcha mai bakah mihringte tan ngei pawh hian he inpawngnekna hmunah hian a ruh no no chhuakah tih a ngai ta a. Nang leh keiin kan pawm leh duh vang reng pawh a ni lo a, sualnain a hrin chhuah a ni ber zawk a, he inpawngnekna ramah hian a ding chang tur chuan mi aia chhelna leh huaisenna neih a ngai a, ramsate ngei pawhin hei hi an neih ve a ngai chiah tho a ni. Ramsate leh nungchate chauh a ni lo a, thlai leh thingkungte ngei pawh hian survival of the fittest kalphung hi an zawm ve vek a ngai tho a ni. Ram hnuaiah kal ila, thing tam tak awmna hmunahte hian engvanginnge changel leh thingkung no ang chite hi an awm ngai loh a, a awm chhunte pawh tinge ria fi tak tak an nih thin kan tih chuan an ni aia tlo leh khauh zawk thing dangte chuan an nek nasat thin vang a ni. 

Mihringte ngei pawh hian he kalphung hi sawi miah loin leh ziak ni miah lo mah sela zawm a ni tlat a, politics, pawl hrang hrang leh Kohhranah ngei pawh hian a ruh no no chu chhuakah kan ti a nih hi. Nakin hnu lam ngaihtuahna nei miah loin mahni sahmim hnawhpuarna atan kan thenawmpa ngei ngei pawh kan nek hreh lo a, kan nek chang a ni lo a, kan la hek duh hial zawk a. Mizo tlawmngaihna tihte chu kan hmui chin chiahin kan sawi em ni tih turin kan thiltihah hmuh tur a awm ngai reng reng lo a, hetiang reng a nih hi chuan kan thangthar rawn la chhuak leh turte hi chuan tlawmngaihna hi thawnthu angin an la rawn hre ruai ruai chauh ang tih pawh hi hlauhawm tak a ni awm e. Chumi hunah zet chuan inchhirin ban a chen satliah lo ang a, hlam a chen tawh zawk ang a, siam that tum eng ang mah ila a har hle tawh si ang. Chuvangin, nang leh kei hian vawiin hun atanga he tlawmngaihna hi kan thangthar lo la awm leh zel turte tan hian kan tawngkam ringawt niloa a taka kan chawinun a ngai a ni. 
Engkim mai hi politics ang veka kan ngaih tawh avang zawk erawh chuan kan politics ber hi siam that a ngai a, kan politiciante hian midangte tana zir tlak turin he kan Zoram politics hi an siam that a ngai a ni. Lehkhabu kan chhiar atangin leh rual u zawkte sawi kan hriat dan atangin kan ram politics hi UT kan nih atang khan a bawlhhlawh tan e an ti a, a dik viau mai thei. Chik zawkin han sawi ta zel ila, chu a bawlhhlawh chhanna ber pawh sum a tam vang a ni a, central atanga development sum kan dawnte alo tam tak avang chuan sum khawih kan chak a, sum enkawltu nih kan chak na chuan politics bawlhhlawh takah vawiin thlengin kan ramah hian sulhnu tha lo tak min hnutchhiah ta a ni ber mai. Heng kan han sawi tak avang hian khang hruaitu hmasate kha an bawlhhlawh ta vek e tih erawh a ni hauh lo a, an zinga mi pamham leh bawlhhlawh awmte an lansarh avangin mi chhuanawm leh fakawm tak takte chu an hliahkhuh tak thin vang a ni a, a pawi em em a ni.  

Kan sakhaw puithiam, Rev. Zairemate meuhin ram leh hnam hmangaihna avanga Mizo Union-a hruaitu dinhmun an han changte kha a lawmawm tehlul nen MU ber pawh chuan a mit a tlung zo chiah lo nge ni Sialsûk atang khan a zan a zanah a hawngin a bâng nghal ta mai a. A mak ve bawk reng reng a, Sialsûk hmuna Mizo Union-in Lal bân chungchang an rél a, mizo Lalte awm zel dan tur ruahmanna mumal tak an nei lo kha a ni Sakhawmi tan kha chuan hriatthiam har tak tur a ni. MP-a a in-candidate-te kha lo tling sela ram mipuite chuan kan chhawr dawn tehlul nen a tling zo ta chiah bawk si lo a, a ni ang hi Mizo hmeichhiate hian hring chhuak leh tak ang maw le. A ni chauh lo pawh ram leh hnam hmangaih tak tak hi sawi tur an awm a, vawiin thleng pawha ram rawngbawlnaa la inhmang zingah ngei pawh hian mi chhuanawm tak tak an awm, nimahsela thing tam tak zinga changel kung ang maiin an duh angin an thaw thei lo a, fi ria thîlh thelh takin an nung ve mai mai chauh a nih ber hi. Khawngaihthlakin. 

Kan ram hruaitute ber lah chuan nakin hnua thangtharin an la rawn fak leh chawimawi theihna turin hnathawh that lam an buaipui reng reng lo em ni tih tur ang maiin tawngkam lamah an chak em em thung a. An thiltha tihchhunte lah a lian emaw a te emaw an puangzar nghal zung zung zel ang lawi bawk a, publicity lama hriat hlawh takte hi chu a boruakah ringawt hian an thamral duh viau a ni. Ram hruaitu tha leh tha lo te hi mahni awmhmun atangin tupawh mai hian kan lo thliar ve zung zung mai zel tawh avang hian a boruak chauha thawm lian leh vote zawn lai chauha min rawn be tha tute hi chu tawngkam nem takin lo chhang thin mah ila kan vote nawn leh tak tak ngai chuang lem lo tih kan hun kal tawh atangin kan hrechiang theuh awm e. Ram mipuite hian ram hmangaihtu dér leh tak hi kan hriatthiam ve tho avangin kan inbum thei tak tak lo a, 2018 Election-a MNF party chakna chhan ber pawh an hruaitute’n ‘MNF hi a piangthar tawh’ an tih te ‘kum sawm chhung (an sorkar hmasak kha) kha inzirna atan kan hmang a, kan thiam tawh a ni’ an tih bakah awihawm taka Nuaih 3 sem tur anga an insawi vang a ni bawk ang. 

He ram hi ka ram a nih tlat avangin eng platform atang pawha hmangaihna ka lantir hi ka tihtur pawimawh tak a ni a, tuna politics platform lam kan han sawi taka tang hian hmun dangte pawh kan sawi tel tho tih hria ila a tha awm e. Eng pawlah pawh awm ila, kohhran huangchhung atang ngei pawhin he ram hi kan ram, kan lu nghahna hmun tur leh kan thlahte pawh an la rawn seilenna zel tur a nih tlat avangin sulhnu tha hnutchhiah tum hram hramin ram leh hnam hmangaihna lantir hi kan bat theuh a ni.