Aizawl June 13, 2024 : Ni 4 chama Mizoram Horticulture Department hmalakna te rawn enfiah tura rawn kal Central Team, Govt of India, Ministry of Agriculture & Farmers Welfare te nen vawiin khan Aizawl Club-ah inkawmhona an nei a, Mizoram Horticulture Department te hmalakna te thlir ho niin Horticulture Minister Prof. Lalnilawma chuan he hun hi a hmanpui.

Horticulture Officer ten power point presentation hmangin Mizoram-a Horti hmalakna te an tarlang a, Dr. Naveen Kumar Patle, Addl Commissioner leh a team te chuan heng an hmalakna-a harsatna an tawh te zawt nghal zelin thurawn te an pe a, hmalak zel dan tur te, Loneitu ten awlsam zawk leh hlawh zawka hma an lak dan tur te an sawi a, Central Team te hian theihtawpa hmalakpui zel turin an inhuam thu an hrilh.

Dr. Naveen Kumar Patle, Additional Commissioner, Ministry of Agriculture chuan Mizorama horticulture hmalakna a hmun ngeia an hmuthei chu a lawmthu sawiin Central-a policy duangtu an nih laiin a chhawr tute nen hun hman fo a tul thute, heng atang hian sorkar policy thar duan a fuh ber thu a sawi a. Tuna India rama Cluster Horticulture Development hmalakna kal mekah Mizoram pawh a telve theih thu sawiin, Anthurium cluster, Dragon fruit cluster leh Serthlum cluster te chu hmuh a chakawm thu a sawi a, Central ah Ministry thar a pianga, Union Agriculture minister thar pawhin Mizoram hi a hmunah rawn hmu ve ngei se tiin hetiang tur hian program pawh siam a tha dawn hle niin a sawi. Mizoram chu dragon fruit ching zingah a rah a tui bik zia sawiin Dr. Patle chuan India ram pum huapa Dragon Fruit Conference Mizoram ah nghah ni thei se, chutiang tur chuan hmalak a rawt nghe nghe a ni.

Central Team te hi June 11 khan Mizoram rawn thlengin Sairang-a Bamboo Processing Centre leh Cold Chain chu an tlawh nghal a, Zo-Anthurium Growers C-operative Society (ZAGCS) an tlawh nghal bawk.

June 12, Nilaini khan Centre of Excellence for Vegetables, Mat kam, Serchhip District-a ruahmanna kal mek chu a hmunah an tlawhpui a Mat Zawlpui-a kuthnathawktute nen inkawmhona an nei a. Tukin zing khan Anthurium leh Dragonfruit huan, Durtlang an tlawhpui bawk a ni.