— C.Sangzuala, Chaltlang Tlem lai deuh khan kohhran sitna lam hawi ni tin chanchinbuah a chhuak deuh fo va. Thenkhat chuan kohhran hian a tih tur ti lovin, a tih loh turah a inrawlh tia ngaih theihin an ziak nual bawk a. Hetiang thu chhuah tam lai kha sawrakarin zu zawrhna leh a thunun dan tur a ruahman lai kha a ni a. Tunah chuan sawrkarin hawi lam chiang tak a nei ta law law a. Kohhran duh dan chu chiang hle mah se, a thulhtir tur zawnga sawi chuan awmzia a nei rih dawn lo a ni ta ber awm e. Mizorama kohhrante hlawhtlin leh hlawhtlin loh chungchangah ngaih dan sawi duh hlawm ta ila, ngaih dan pawh a thuhmun hlawm lo ang. Hlawhtlinga ngai leh hlawhtling lo, hlawhchham hiala ngai pawh kan awm pawlh nuk mai thei a ni. Kohhran a ni emaw, pawlho dang a ni emaw, an chungchanga kan ngaih dan kan sawi dawnin pawlho din chhan leh an thil tumte hriat hmasak a pawimawh thin a, chung thil hre lo ang maia an tih loh tur ti, an tih tur ti lo ang zawnga sawi te hi fimkhur tulna lai a ni ang. Roreltu thlan dawnin kohhran chuan political party-te leh mipuite ngenna thuchah a chhuah thin a. Sawrkar thar a lo dinin inkawmna hun remchang siam te a rawt bawk thin. Ram pum nghawng tham thil pawimawh lian zual a lo awmin kohhran chuan a duh dan a puang chhuak a, thil awmdan azirin sawrkar dawr leh ngen chang pawh a awm. Hetiang thil kohhranin a tih thin hi kan zingah hre thiam lo, ngaithiam lo leh tul ti lo kan awm thin niin a lang. Kohhran chuan kohhran leh sawrkar chu inzar zawm si lo, mahse ram leh mipui tana tha turah chuan thurawn te inpe tawna, a remchan dan anga thawk ho turah a ngaiin a beisei niin a hriat a. Hei hi kohhran siamthatnaa mi ropui John Calvin-a ngaih dan leh zirtir dan an rochun niin a lang. Chutiang rilru pu chuan kohhran hian inthlahrung lovin, hawihhawm tak siin political party te, sawrkar lo awm apiangte a hmachhawnin a dawr thin a, fiah retrawta a ngaih dan puan chhuah chang pawh a nei thin. Kohhranin hetianga a ti thin hi Calvina ngaih dan ken kawhna mai a ni lo va, ram chhungah rorelna dik leh tha (good governance) a awm theih nan, mipui te hlim leh him nan a ni. Kristiante chu “I ram lo thleng rawh se” tia tawngtai thin kan ni a, Isua min zirtir dan a ni bawk. Kan ramah Pathian duhzawnga rorelna a awm theih nan theih tawp a chhuah thin a ni. Zu chungchangah pawh thuneitute hnena a duh dan a thlen thin hi, tun hma lam zawnga zuin Mizo nuna nghawng a neih dan atanga thlira ngaih dan sawi chhuak thin a ni mai a, a tih theih tawk a ti ve hi a tih tur tia pawm thiam a tha hle ang. He thu ziaktu mi mal thlir danah chuan he ramah hian kohhran hi a hlawhtling viau a tih theih. A din chhan leh a thil tum langsar zual-Kohhran din leh enkawl kawngah te, ram thima chanchintha hrilh darh kawngah te (tunah hian Mizoram Presbyterian Kohhran hian rawngbawlna field 19+2 neiin, missionary 2363 a ruai mek a. Zoram Baptist Kohhran pawhin field 24-ah missionary 900 vel a ruai mek a. Kohhran dangte pawhin an phu tawk an ruai hlawm), lehkha zirna (education) kawnga a thawhnaah te, tihdam rawngbawlna kawngah te hian, duhthusam thleng pha lo mah se a hlawhtlinna hi a sang viau a ni lawm ni? Heng kawngah hian kan ramin kohhran zar kan zona hi chhut tham tak a ni ve ngei ang. Hengte bakah hian mipui hmakhaw thatna tura hna thawh tam tak a la awm a. Dinhmun harsa zawka dingte tanpui leh dawm kan kawngah te pawh hian kohhran hnathawh hi fakawm tham a ni ve mai thei. Kohhranho Harh tharna tura a beihna kawngah phei hi chuan hlawhtling langsar hlea sawi theih dan a awm awm e. Revival Team-te siamin Thuhriltu rualin tualchhung kohhran hrang hrang an tlawh kual reng a, “Chu mi kha mi kohhranah harhna a thleng, an hlim khawp mai” tih hriat tur a awm mar reng a ni ber a. A lawmawm hle rualin ngaihtuah ngai a awm a ni mai thei. Kan harhna chan daih rei hlei thei lo te, tlawhtu neih fo kan duh thin te, camping chhuak thawm na tak zingah sual haw thar te, sim thar te, mi rin tlak thar te an vang deuh em ni? Speaker-te hian han harh phutna hi thlenpui an tum chin (goal leh target) a ni mai em? Mipuite pawh hian heng bak hi an beisei thiam lo a ni ang em? Kan harh zing narawh a, mi tharah erawh kan inchhuah tlem si a ni em? Kohhran din leh enkawl kawnga kan hlawhtlinna pawh hi en chian a ngaih hmel. Kohhran awm tawh sate atanga mahni kohhran member tipung tura beih kan thiam lutuk deuh em? Isua a lawm tak tak ang em? Member tam tak nei tura kristian ni sa, mi beram ruk tuma ualau taka beih te hi ruk ruk dan thianghlim a ni ang em? Kan zui Lal Isua ngaih pawimawh langsar tak chu ‘khawvel >ng ni tura nun ngeia thu sawi’ hi a ni a. Chu chu ring lote kan hipna tura a sawi a ni. Kan ram kristian nawlpui nun hi kan khawpkham lo tlang a ang hle a. Nun dan ngeia kristian tak chher chhuak turin kan rawngbawlna goal/target hi bih nawn a ngai mai thei ang em? Tun hma hun rei tak chhung khan langsar taka kohhran sawiselna lam hi hmuh tur a tam lo hle thin. Tunah hi chuan thil kal dan a danglam ta hle. Khua leh tui mi tin hian duhzawng sawi theihna zalenna kan nei ngei a, mahse chu chu mawhphurhna keng, chhia leh tha hriatna fim hmanga kalpui chi a ni. Kohhran hi sakhaw pawl a ni a, sakhuate zahawmna hi hriat tel ve zel a tha ngawt ang. Sawi awm chin leh sawi awm loh chin te thliar thiam a pawimawh ang. Kohhran hi hlawhtling lo hlea kan ngai a nih pawhin, kan ramah hian kohhran hi awm ta lo se mipui nun hian eng nge a an ang le?