Aizawl September 29, 2023 : Zirtawpni hian Mizo National Front chuan Mizo Hnam Runah chhung inkhawm an nei a, he huna thu sawitu MNF Adviser J. Malsawmzuala Vanchhawng, Vice Chairman, MNF Publicity Board chuan leiba ngah viau anga opposition ten an sawi chu a sawifiah.

J. Sawma chuan, "Tunlai hian Opposition party thenkhatten Mizoram sawrkar chu sum hmangthiam lo leh chumi avanga Leia nghah ta em em angin an tlangau mek a, sawrkar chu Leiba thanga `awka talbuai mek, chhanchhuah ngai angin an chhuah, sawi duh chin an nei mai a ni," tiin, "Bat loh theih chu a tha ber a, chutih rualiin sum pek tur te hi Budget kan pharh ah a inbelh tel sa vek a ni. Kan sum hmuhna tur hrang hrang, Central atanga kan dawn thin Share of Taxes, Post Devolution Revenue deficit grant bakah Loan hrang hrang turte chhut sa vek a ni a, GSDP atanga chhutin chhinchhiah fel sa vek a ni," a ti.

Sawma hian sawrkar hnathawk hlawh pek chungchang pawh sawiin, "Central sawrkarin sum pek chhuah danah ruahmanna thar a siam a siam tak avangin thil hi a la inher fuh lova. Central sawrkar hian CSS hnuaia sum a rawn pek thin te hi Ni 21 chhunga pek chhuah zel tur a lo ni ta a. Sum kalhmang tih danglam a nih tak avanga kan harsatna te hi kalphung pangngai zawh chho tura hmalak mek a ni a. Tuna kan dinhmun angah hi chuan tu sawrkar tan pawh harsatna hi pumpelh theih a ni lo," a ti

MNF Adviser chuan, Party thenkhatin an that tawk lohna lai heihluak taka an sawi thin leh a chinfel dan tur an chhawp chhuak leh silo te chu Thalaite kawng dik lova hruaitu a ni ang tih a hlauh thu a sawi bawk.