Kum 17 zet zawt zu khap burna Dan, Mizoram Liquor (Total Prohibition) Act 1995 kan hman hnuah Congress sorkar chuan khap bur ni lova khuahkhirh dan ngaihtuahin July thla laihawla Assembly Session (tun sorkara a vawihnihna) lo awm turah Mizoram Liquor (Prohibition & Control) Bill 2014 chu Act ni turin put luh a tum a. Hei hi mi tam takin tha an tih lai leh mi engemawzatin an nghahhleh em em laiin Mizoram sakhaw hrang hrang zinga Kristian sakhuaa Kohhran lian ber, Presbyterian Church of India Mizoram thuneitu Mizoram Synod chuan theihtawpin a dodal a. He dodalna hian sawi pawh a hlawh hle nghe nghe. Hetia sorkar berin zu zawrh a phalrai leh dawn nia hriat a nih phat atangin Kristian sakhaw zinga Kohhran hrang hrangte chuan an inzawmkhawmna Mizoram Kohhran Hruaitute Committee kaltlangin MLTP Act hlih an duh loh zia an sawi chhuak hlawm a. Sorkar erawh chuan sawiselna hi ume lem lovin Assembly Session-a pass a nih tur thu chanchin thar lamah kan hmu ta reng a. Hei hi Presbyterian Kohhran bik chuan ngai ngam lovin Synod hialin dodalna buatsaih a rel ta a. MLTP Act hlih a nih loh nan kawngzawh hial buatsaih tha a ti a, phungbawm atan Mizoram tlawmngai pawl lian pathum, YMA, MUP leh MHIP a sawm a. Heng pawl lian pathumte hian Synod meuh sawmna chu an hnial ngam lovang tia mipui lamin kan lo thlir laiin YMA, MUP leh MHIP te chuan MLTP Act hlih duh lohna kawngzawh an thlawp theih loh thu leh a chhan hrang hrangte an rawn tarlang ta mai a. Zu hi Mizo mipui hian kan duh lo nachungin MLTP Act hi kan ning hle tih he thil hian a tarlang chiang khawpin a lang. Heti taka ngaihven hlawh leh sawi hlawh ta chu MLTP Act 1995 thlakna tur chu enge maw ni le tiin Mizoram Liquor (Prohibition & Control) Bill 2014 copy chu neih dan ka ngaihtuah ta a. A copy hi hmuh tur a vangin chanchinthar lakhawmtu lam pawhin an lo nei fumfe lo a. Ama’rawhchu tunhnai deuh mai khan Aizawl atanga chhuak nitin chanchinbu Mizo Aw chuan he Bill atanga lak chhuah thenkhat (excerpt) a rawn ti chhuak thin a. Hengte hi hmang tangkaiin engtin tin emaw Bill copy chu ka nei ve ta hlauh mai a, a lawmawm ka ti khawp mai. Mizoram Liquor (Prohibition & Control) Bill 2014 hi zirchian tlak a awm tak meuh meuh a. Keini ang Dan hremi nilo tan chuan sawisel tur a tam lo hle. Mak ka tih em em pakhat, mipui leh Kohhrante pawhin kan hriatchian loh nia ka hriat chu zu in tur tan permit a ngai dawn tih hi a ni. Zu zawrh phal a ni dawn han tih hi chuan kan mitthlaa lo lang hmasa ber chu zu dawr bawr luai luai leh zu rui khawlaia kal pai tuang tuang, buaina siam te a ni a. Tunhmaa kan lo tawn thin a nih avangin hetiang mitthlaa a lo lang hi a awm lo lo a, Presbyterian Church Synod pawhin hetiang hi an mitthlaa an hmuh avanga MLTP Act hlih dodal an ni tih hi a chiang reng awm e. Tuna MLTP Act thlakna tur Bill-ah erawh hi chuan a hman hman leh a duh a piangin zu hi an lei thei dawnin a lang lo. He Bill, Chapter VIII, Prohibitions, Offences And Penalties tih hnuaia Section 42 (2) ah chuan “No person shall consume liquor except on a permit granted under the provisions of this Act or the rules made thereunder, as the case may be” tih a inziak a. Hemi awmzia chu he Dan hnuaia zu inphalna nei chauh te lo chuan zu hi an in thiang lo a ni. Zu in phalna permit nei lo chuan a lei pawh an lei thei dawn lo tih chu ziak ngai lova chiang sa a ni a. Chuvangin kan mitthlaa zu dawr lun em em kan hmuh kha mumang ram chauh a nih duh hmel hle a ni. Tin he Section 42 hnuai thovah hian sub-section (3), (4) leh (5) te chuan ualau taka zu in te, zu ruih avanga buaina siamte leh zu rui chunga lirthei khalhte a khap tlat bawk a. Section 43-naah chuan Section 42 hnuaia Dan bawhchhiate hremna a chuang leh a. Hremnate hi lungin tan leh pawisa chawitirte an ni. (Hmun a tlem avangin kan ziak kim thei lova, a pawi khawp mai). Chutiang a nih chuan MLTP Act hlih avanga buaina leh harsatna punlun ta chiam tura kan rilru alo inbuatsaih chu a thlawn dawn a nih leh ta hmel hle. Bill/Act tha tak a nih rual rualin Mizoram Liquor (Prohibition & Control) Act 2014 hi a pass tu tur kan MLA zahawm tak takte hian uluk takin zir se a duhawm hle mai. He Bill duang chhuaktute hian an ngaihtuah kimin an uluk hle a. Chutihrual chuan Department lam invenna a nasa lua in human rights bawhchhiatna a awm thei ang em tih erawh chu ngaihtuah tel a ngai awm e. He Bill-a Chapter X Miscellaneous Provisions tih hnuaia Section 79-ah chuan Rorelna (legal proceedings) in a huam loh tur a inziak a.Chutah chuan he Dan hnuai anga miin an ngaiha dik (good faith) nia an hriat a Dan an kenkawhna lamah Rorelna lama khin theih an ni lo ang tih leh bungraw tihchhiat a nihin Rorelna an chungah lekkawh theih a ni lo ang tih te a awm a. Hei hi han en mai a tha viau a lan laiin he Dan kengkawhtute hian an nawm an makin mi chungah Dan tlawh chhanin kut an thlak thei tihna a ni a. Tuna sipai lamin Armed Forces (Special Powers) Act an hman mek nen hian human rights lam zawnga thlir chuan a danglam lutuk lo mai awm e tih theih a ni. Section 80-na sub-section (1) ah chuan Dan kengkawhtu (Excise leh Police) te an nawm an makna an chet theih lohna tur Dan ni awm tak chu tarlan a ni ve a. Hemi ang chuan Dan kalha heng Force mite an chetna hremna kawngah Prosecution lamin thla 3 chhunga hmalakna an neih loh chuan Magistrate in Dan kalh a che a puhte chungah hian rorelna a lek thei lovang tih a chuang a. Sub-section (2)-ah phei chuan sorkarin chhui phalna a pek loh, Excise leh Police te chungah Dan kalha an chetna anga hekna chu Rorelna chuan a pawm tur a ni lo tih ala chuang nghe nghe a ni. Dan kengkawhtute tan chuan Section 79-na leh Section 80-na te hi a that hle laiin Excise leh Police-te humhimna a zau lutuk deuh niin a lang a, hei hi human rights buaipuitu lam chuan an helh ngeiin a rinawm. Sawi tawh angin he Dan duangtute hian an uluk hle a, an Sap tawng hman pawh sawisel tur a awm lo niin a lang. Chutihrual chuan ka hmuh theih chinah typing mistake/Sap tawng dik lo pahnih ka hmu ve khanglang a. Section 22, sub-section (2)-ah “... shall stand forfeited...” tih turah “...shall stands forfeited...” tih leh Section 44, subsection (2) ah “...that it was intended for personal consumption...” tih turah “....that is was intended for personal consumption...” tih a awm a. Thil pawi an sawi lo na a, a dang zawng a dik vek laia a dik lo lo awm zeuh hian rilru a la ve deuh. MLTP Act 1995 paih a Mizoram Liquor (Prohibition & Control) Bill 2014 sorkarin a duang chhuak hi hlauh tur awmin a lang lova. Sorkar hian zu zawrh leh in hi a control dawn a, MLTP Act hnuaiah pawh a duh duhin an in in an zuar tho a. Sorkar hriatpuinaa zawrh mai hi a finthlak hle zawkin a lang a. Sorkar sum zema lut lo, tuna zu man tam tak mimal tlemte kuta lut hi MLPC Act hnuaiah chuan sorkarah a lut dawn a. Sum it vang pawh ni lovin thalaite hriselna tur zawk leh zu laka kan fihlim theihna tur zawk niin a behbawmah zawk sum hi chu a lang ve chauh niin a lang. — David M.Thangliana