Aizawl; April ni 9,2014-a Mizoram Lok Sabha MP thlanna neih turah hming pekluh theih ni hnuhnung ber nimin tlai dar 3 thleng khan chuh turin mi 4 in Nomination an file a, MP thlan ruala neih tur Hrangturzo Assembly bye-election chuh turin mi 2 in hming an pelut bawk. Mizoram Lok Sabha seat 1 chuh tura hming pelut te hi M.Lalmanzuala (Aam Aadmi Party), CL Ruala (Indian National Congress), Vanlalngaia (Independent) leh eptu party hrang hrangte thlawp Robert Romawia Royte (Independent) te an ni. AAP candidate M Lalmanzuala hian symbol-ah hmun-phiah a hmang dawn a, Congress candidate CL Ruala'n kutphah, Robert Romawia Royte in gas cylinder leh Vanlalngaia'n 'baterry torch' te symbol-ah an hmang ang. Nomination te hi naktukah endik a ni ang a, March ni 26, 2014 (Nilaini) thleng a duh tan inhnuhdawh theih a ni ang. Hrangturzo bialah hian INC candidate Vanlalawmpuii Chawngthu, MPYCC President leh eptu party tangrual candidate H Lalduhawma te an inbei dawn a ni.