Aizawl April 20, 2024 : Mizoram Lok Sabha MP inthlana vote tla chu a pum puia chhutin 56.60% a tling a. Inthlanna hman Electronic Voting Machine (EVM) pawhin nimin zing khan district khawpui hrang hranga strong room an thleng kim tawh bawk.

ZALEN-in Addl. Chief Electoral Officer Dr. H.Lianzela hnen atanga thu a dawn danin vote tla zat hi scrutiny neih mek a ni a, tun dinhmuna hriat theih chinah vote tla zat hi la danglam leh thei a ni tih a sawi.

Tun tum MP inthlan chu MP inthlan awm tawha vote tlak chhiat ber tum a ni lo tih sawiin, “Kum 1977 kha vote tlak chhiat ber tum niin 49.29% a tla a, kum 1996 kha a tlak that ber tum niin 73.41% a tla a. Kumin MP inthlanah hian kum 85 chung lam vote thlak mi 1,715, pianphunga rualbanlo (PwD) vote thlak mi 268 leh absentees voter 124, an vaiin service voters tel lovin mi 2,107-in an thlak a ni,” a ti.

Polling party-ten tluang takin district khawpuia strong room an thleng vek tih sawiin, “Polling party zingah 36 Tuichawng constituency hnuaia Borapansury chu thleng tlai ber an niin Inrinni zing dar 7 khan Lawngtlai an thleng a. Tun tum inthlanah hian EVM thlak ngai BU 10, CU 10 leh VVPAT 25 a awm a, tum dang aiin thlak a tlem zawk a ni,” a ti bawk.

Dr. H.Lianzela chuan tun tum MP inthlanah harsatna awm lovin tluang taka neih zawh a ni chu lawmawm a tih thu a sawi a. “Power supply-ah duhthu a sam lo deuh tih mai loh chu engkim tluang takin kan ti thei a. Inthlan buaipuitu, Kohhran hrang hrang, NGO leh MPF chungah lawmthu kan sawi a ni,” a ti bawk.

Zawhna chhangin kumin Lok Sabha MP inthlanah hian ziakin model code of conduct bawhchhiatna an dawng miah lo niin a sawi. MP inthlana vote tla te hi June ni 4,2024 hian district khawpui hrang hrangah a ruala chhiar tur a ni.