Aizawl: Mizoram naupang 362 te chu mi hrang hrang ten fa atan an la tawh a. Fa lak (adopt) chu dan hnuaiah ngei tih nise a him bik tih State Adoption Resource Agency thawktu ten ZALEN an hrilh.

Mizoram naupang 362 te hi mi hrang hrangin an lak a ni a, an zinga 309 hi India ram chhunga lak an niin a dang 53 hi ram pawn a lak an ni a. India ram pawna fa/nau latu tam ber hi European ram te an ni.

Mizoram State Adoption Resource Agency a Programme Manager Lalmuanpuii Chhakchhuak chuan dan hnuaiah ngei mi ten fa la se a him bik tih sawiin, "Mi thenkhat dan pela hmanhmawh deuha thil lo ti thin te an awm a, heng mite hian buaina tawk palh ta se kan tan tih theih a awm lova. Nau la duh leh pe duh pawhin keimahni kaltlang hian ti ngei se kan duh a, keimahni kaltlanga thil ti te chu 100% himah kan ngai a ni," a ti.     

SARA kaltlanga nau/fa la te chu an vilzui renga naupang te chu India in a thawhpui/inremna a siampui ramah chauh an pe thin.

ZALEN zawhna chhangin Mizorama fahrah tamna chhan ber chu “Retheihna avanga fate enkawl zui thei lova home a dah hi an tam a. Fahrah tak tak hi chu a tlem zawk an ni,” tiin SARA hnathawk chuan a chhang a. Nuapang te chu tualchhunga pek hmasak ber an tum thin thu a sawi bawk.

Fa lakna ‘Adoption regulation’ hi 2017 atanga hman tan a ni.