Mizoram Governor Dr. Hari Babu Kambhampati chuan, "Mizoram Peace Accord hi kan State tana beiseina eng leh midangte tan pawha khawnvar anga chiang taka hmuh theih beiseina eng leh entawn tur, Remna thuthlung hlawhtling tluantling awm tlem te zinga mi a ni," a ti.

Aijal Club buatsaihin nizan hmasa khan RB McCabe Hall, Aijal Club-ah remna thuthlung ziah (Signing of Mizoram Peace Accord) hriatrengna hun leh lawmna programme buatsaih a ni a. He hun hmanpuitu Governor Dr. Kambhampati chuan state puma mipui zawng zawngte duhsakna chibai a buk a. Governor chuan he ni pawimawh tak hian remna leh muanna, inpumkhatna leh hmasawnna kawnga ke pen kan duhna a ti chiang tih a sawi a. "Remna thuthlung ziah ni hi kan ram ropui tak chanchin ziahnaah hmun pawimawh a chang reng tawh dawn a ni," a ti a. Remna a awm theihna tur te leh Mizoram tana hmalam hun êng zawk siam tura remna kawnga thawktu zawng zawngte chungah Governor chuan lawmthu a sawi bawk.

Governor chuan remna thuthlung ziah a nih theihna atana theihtawp chhuahtute Laldenga, Mizo National Front (MNF) Founder President, Mizote tana hruaitu nih tling, Lal Thanhawla, Chief Minister, remna a awm theihna atana a lalthutthleng thawhsan tu leh Lalduhoma, Chief Minister ni lai, khatih hun laia MNF leh India sawrkar inkara palai hna pawimawh thawktu te an ngaihsan awm tih a sawi a. Zoramthanga, Ch. Chhunga leh Brig. T. Sailo, Mizoram Chief Minister lo ni tawhte pawhin he remna leh muanna hlu tak a lo awm theih nan an thawh hlawk hle tih a sawi bawk.

He hun hmanpuitu Chief Minister Lalduhoma pawhin remna leh muanna a awm theihna atana theihtawp lo chhuah tute inpekna chu a ropui a tih thu a sawi a. "Mipuite tawngtaina Pathianin a chhang a, remna kan neih theih bakah he remna hi a tluantlinga kan vannei hle a ni," a ti. Chief Minister chuan kan hun tawn atang khan kan inzir fin a pawimawh a ni tiin, "Tunah chuan remna leh muanna duhtu kan nih angin India khua leh tui rinawm tak nih kan tum a pawimawh a. India ram hi khawvelah minority te tana zawl dawh ber leh minority te ngaihven ber ram a ni a, kan vannei hle a ni," a ti a. Chief Minister chuan remna leh muanna chuan rah tha a chhuah thin a; hmasawnna leh changkanna te nei tur chuan remna leh muanna hi nghet taka vawn tlat a ngai tih a sawi bawk.

Mizoram Peace Accord, 1986 hi India sawrkar leh Mizo National Front (MNF)-te kara inremna thuthlung, Mizorama helna, kum 1966 atanga intan tihtawpna a ni a. He document hming hi Mizoram Accord, 1986: Memorandum of Settlement tih niin June 30 khan Laldenga, MNF President, RD Pradhan, Union Home Secretary leh Lalkhama, Chief Secretary, Government of Mizoram ten hming an ziah hnan a ni.

Remna ni lawmna programme hi Dr. Renu Sharma, Chief Secretary leh President, The Aijal Club-in inlawmna thu sawi hmasa in tan a ni a. A tir lamah Mizoram Circa 1960 to 1990 tih video thlirho a ni. Hemi hnu hian Governor Dr. Hari Babu Kambhampati chuan Mizoram Chief Minister hlui Laldenga (L), Lalkhama, IAS (Rtd), Signatory of Mizoram Peace Accord, Lal Thanhawla, Mizoram Chief Minister hlui, Rothangi w/o Ch Chhunga (L), Mizoram Chief Minister hlui, Brig. T. Sailo (L) Chief Minister hlui, Zoramthanga, Chief Minister hlui leh Lalduhoma, Chief Minister te hnenah chawimawina thilpek a hlan a. Program hi Rin Sanga, Vice President, Aijal Club-in lawmthu sawiin a khar a ni.