Aizawl; Assam lam in Phainuam VC huam chhung, Mizo leilet ah kawngpui an rawn sial vangin Mizoram police te leh Assam police te chu Saihapui V lui kam ah an inep mek a, Assam lam hi lui kan tumin JCB nen an inchhawp a, inepna boruak sang tak a thleng mek. 

Phainuam atanga ZALEN thudawn danin, nimin zing dar 8 bawr vel khan Assam lamin Phainuam VC area chhung, Buarchep zau an tih, Chalchhunga Kuhva huan ah Assam lam in JCB 3 hmangin kawngpui an rawn lai a, hei hi hriat a nih veleh leilet neitute leh Phainuam thalai awm ang ang te a hmun ah an kal nghal a, an hnathawh titawp tur a hrilhin, let turin an hrilh a, hei hi zawmin kawngpui laitute pawh an let ve nghal a.

Hetihlai hian reilote ah Assam police te nen rawn kir lehin, an rawn tharthawh leh a, Assam police hmeichhiate chu hmatawngah an rawn dah a, an tam deuh bawk vangin dah ngaihna an awm lo niin Phainuam atanga thudawnna chuan a sawi a, an lo dan na ah hian civil mi zingah Assam police te kuttuar pawh an awm niin a sawi.

Assam lamin kawngpui an rawn laihna, Mizo leilet atanga metre 300 bawr vel ah Saihapui V lui awmin, chumi lui ah chuan he thu ziahlai nimin tlai thleng khan inepna boruak tang tak a thleng zui a, Assam lamin Saihapui V lui, ke a kal kai theih chu lirthei a zawh kai theih turin leivung a chhilh an tum a, hei hi Mizoram lamin ti lo turin an hrilh a, Assam lamin an hmalakna hi an tilui a nih chuan inkahna hial pawh thleng thei mai dinhmun ah a awm tih thudawnna chuan a sawi bawk.

Saihapui V lui ral, Assam lam hnaih ah Mizo chenna In 1 awmin, chunglai chhehvel zawng zawngte chu Mizo leilet vek a ni tih Phainuam atanga ZALEN thudawnna chuan a sawi a, tun dinhmunah chuan chunglai hmun te chu Assam lam in rawn pel pheiin, Mizo leilet te chu inkulhna atan an hmang mek niin a sawi.

Mizoram leh Assam police te inepna lai bawr velah nimin chawhnu lam khan gelatine a puak a, pawikhawih erawh a nei lo. Phainuam leh an khaw chhehvel a civil mite pawh Mizoram police te tha tichak turin an pungkhawm a, he thu ziahlai nimin tlai thleng kha chuan boruak duhawmlo thleng zui a awm rih lo.

He thil thleng hi hriat a nih veleh Kolasib SP ho in, Addl. SP, SDPO leh IR engemawzah Phainuam ah hian an kal nghal a, he thu ziahlai nimin tlai thleng kha chuan Assam lam hian Saihapui V lui hi an la rawn kan rih lo tih Kolasib SP Vanlalfaka Ralte chuan ZALEN a hrilh.