Mizoram Police te chuan V.Lalhmingthangi thattua puh Irene Lallawmzuali (34) w/o Lallungmuana, Ramthar North chu an man.

Aizawl March ni 17: Mizoram Police te chuan V.Lalhmingthangi thattua puh Irene Lallawmzuali (34) w/o Lallungmuana, Ramthar North chu an man.

Tualthahna thlen chungchangah hian vawiin tlai dar 4 khan SP Aizawl conference hall-ah chanchinbumite kawmin Home Minister K.Sapdanga chuan thil awmdan a sawifiah a.

Home Minister sawi danin V.Lalhmingthangi w/o Zothanmawia, Tuikual South hi New Market-a a dawr VLH Variety store ah tukin zing khan thia hmuh a ni a. Report dawn anih veleh Police leh Forensic te kal nghalin tualthattu ni ngaia rinhlelh Irene Lallawmzuali chu Zemabawk Dinthar venga a thiannu in atangin an man tih a sawi.

An mi rinhlelh kut atang hian tualthahna atana hman ni ngeia lang chemte leh tualthita thil neih ni ngeia lang engemaw zat man tel a ni tih a sawi a. He tualthihna chungchangah hian Aizawl PS ah thubuai ziahluh a ni tih sawiin chhuizui zel a ni tih a sawi bawk.

Home Minister K.Sapdanga chuan hun reilote chhunga Police te hnathawh chu fakawm a tih thu sawiin thil awmdan erawh vanduaithlak a tih thu a sawi bawk.

Tualthattu a puh Irene Lallawmzuali hi mi bungrua laa dawr danga pe chhawng leh thin a ni.

Hetih lai hian Tuikual South all NGO chuan thuchhuah siamin ni 16.03.2024 (Inrinni) zan a chhiat an tawh chungchangah, mipuite chi ai lova, boruak sosang zawnga che lo turin ngenna an chhuah a. Buaina chawk chhuak zawnga engmah ti lo turin Tuikual South mipuite an inngen tak meuh tih an thuchhuah chuan a tarlang a. Social media lamah pawh boruak sosang zawng che lo turin mipui insum turin ngenna an siam bawk.