ZALEN September 04, 2026 : Niminah khan Toyota Showroom, Aizawl-ah The NE Star Music Talent Hunt Mizoram state aiawh tur thlanna Live Audition neih a ni.

Unitex Inc. leh Indian Performing Right Society (IPRS) tangkawp buatsaih, Toyota-in an sponsor The NE Star Music Talent Hunt Live Audition-ah hian zai leh rimawi lama thiamna nei tha tak tak te an inlan a, an zing atang hian Mizoram state aiawh tur pahnih thlan chhuah an ni ang. 

India hmarchhak state dang pasariha Toyota dealer-ah theuh an state aiawh tur thlanna Live Audition neih a ni bawk a. Mizoram audition hi HOM, Michelle Varte leh Zonunthari, Joint Secretary, Social Welfare & Women and Child Development te’n an endik a ni. 

Thlan chhuahte chu September ni 16, 2026-ah The NE Star Instagram page-ah puan chhuah tur a ni a. Hmarchhak state hrang hranga thlan chhuahte chu September ni 27, 2026-ah Guwahati-a grand finale-ah an inel dawn a ni.

Live Audition programme hi Veolf (Vena Fanai) in a host a. Hemi hunah hian zaithiam talent nei tha tak tak, Ruth Chali (Evenflow) leh Booma (Sound from the Hills) te zai ngaihthlak a ni.