Aizawl April 18, 2024 : Dan in kum bithliah a tlin tawh loh avangin leh ruat anih dan ah induhsakna uchuak awm nia a lan avangin Mizoram State Women Commission Chairperson ruat thar AMC Ward III Councillor nilai C Lalchhandami chu ruat anihna appointment notification sut turin Mizo Student Union General Headquarters chuan sawrkar an ngen tih an sawi.

Vawiina MSU General Headquarter Pisa-a MSU hruaituten thuthar lakhawmtute an kawmna ah, MSU President Samuel Zoramthanpuia chuan Mizoram State Commission for Women Chairperson appoint chungchang ah March ni 8, 2024-a Social Welfare Tribal Affairs, Women & Child Development Department in appointment notification a Chairperson atana ruat hi RTI kaltlanga chhanna an neih atanga lan danin sawrkar hna atangin kum 2016 March ni 31-a supernuation-a pension tawh a ni.

Mizoram State Commission for Women Chairperson atan ruat hi a pension kum atanga chhutin kumin hi a kum 68-na tur a ni a, 2021 AMC inthlan pamphlet-a a kum tar lan atanga chhut chuan kum 66 na a ni a, Mizoram State Commission for Women Chairperson atana a bio-data a thehluh-ah chuan kum 64 a ni thung. MSU President Samuel Zoramthanpuia chuan kum chi 3 a nei chu hriatthiam har a tih thu a sawi a, sawrkar-in dan ding lai kalha a ruat hi MSU chuan induhsakna vang liau liauah an ngai a, dikna tun din nan he notification hi a rang thei ang bera sut leh turin an ngen nghal bawk a ni.

MSU chuan thu dik din chhuahna kawngah a ṭul ang zelin sawrkar a thlawp zel dawn a, Mizoram State Commission for Women Chairperson ruat chungchangah pawh dan ang ngei a nih theihna turin a tawp thlenga MSU hma lakna thlawp turin Mizo mipuite leh zirlaite an sawm thu MSU President chuan a sawi a ni.

Mizoram State Commission for Women Chairperson tur hian Notification-a a inziak ang chuan ruat a nih atanga kum 3 chhung emaw kum 65 tlin hma, khawi emaw zawk zawk chhung office hna a chelh thei ang tih chu bawh chhiat a ni tih hriat a nih thu MSU President chuan a sawi.