Aizawl March 28, 2024 : Vawiin khan Congress party chuan MP Inthlan atana Campaign Kickoff Programe Vanapa Hall ah kan hmang a. He hunah hian MPCC President Lal Thanzara, chuan, “Tun tum MP inthlan tur hi keini Mizo Kristiante tana hun pawimawh ber a ni,” a ti a, Mizoram Synod chu Income Tax lamin sum an thing mek nia a hriat thu a sawi.

Lal Thanzara chuan, "Hnam tlem zawk leh sakhaw tlem zawk betute BJP sawrkar hnuaiah hian kan him loh em avangin Mizo mipuite'n kan ngaihpawimawh a ngai a ni. Congress party hruaitu hmasa ten hnam tin ten zalen taka kan sakhua kan biak theih nan India danpui hnuaiah sakhaw zalenna min siamsak a. Chu chu BJP sawrkar hian nuaibo an tum mek a ni. Manipur-ah te chuan Good Friday leh Easter Sunday ah te pawh sawrkar hnathawk te office kai turin an ti a. Mizoram Synod pawh vaibelchhe 25 Income Tax hovin an thing mek niin kan hria a, heng te hi tunhma a awm ngailo a ni," a ti.

MPCC President chuan, "Heng thil dik lo, khaweng pawh zah lova chetna hi tunhma in a la awm ngailo a. Kejriwal an man chungchangah te pawh USA leh Germany te pawh an tawngchhuak hial a ni. Hetih lai hian kan rama rorel lai mek ZPM leh MNF Party te chuan NDA a tel an inchuh ta emaw tihtur a thu thang te hi thil zahthlak tak a ni. Kan ram, kan hnam, kan sakhua a him loh chuan hmasawnna eng ang pawh nei mah ila a him lo anih tih kan hriat a ngai a ni," a ti bawk.