Aizawl February 12, 2024 : BJP Mizoram chuan vawiin (Monday) hian karthar inhlanna leh Political Session hun neiin, Vanlalhmuaka, State President-in thusawina hun a nei a, 2024 Lok Sabha Election lo awm tur hmang tangkai turin Mizoram mipui te a sawm.

BJP Mizoram State President Vanlalhmuaka chuan, "Kum 2024 Lok Sabha election lo awm turah hian BJP sawrkar Pu Modi-a kaihhruai chuan hnehtakin sawrkarna a siam leh dawn a. Kan state retheihna ata khaichhuaha a awm theihna atan leh Mizo mipuite'n tlangnel taka Central sawrkar kan dawr ve theihna turin, Central sawrkar ah Mizoram mipui aiawha kan MP-te thusawiin awmzia a neih theihna atan Kum 2024 Lok Sabha Election lo awm tur hi hmang tangkai turin Mizoram mipuite ka sawm a ni," a ti.

Hmuaka chuan, "Mizoram hian kan thlan fuh chuan Central-ah Mizopa ngei Union Minister kan nei thei a, Mizo mipuite hian he Election lo awm tur hi hmang tangkai turin ka sawm bawk che u a ni. Mizoram hian MP Lok Sabha leh Rajya Sabha ah fel tak tak, State-a rulling party atangin kan lo theh chhuak tawh thin a, Central-ah an thusawiin awmzia a nei mawh hle. Tun tum Lok Sabha Election lo awm tur chu kan state sawrkarna chelhtute tun aia Pu Modi-a sawrkarah an lo tlangnel zawk a, Mizoram mamawh hrang hrang Central a an zu sawi te awmze neia lo umzuipuitu tura, State sorkar sum harsatna ata chhanchhuah theihna turin, Aigupta buhzem bula Kannan fate'n an duh tawk leh mamawh tawk buh lo petu tur Josefa, BJP Lok Sabha MP thlang tura inbuatsaih turin Mizoram mipuite ka sawm bawk a ni," a ti.

Hmuaka chuan sawi chhunzawmin, "MLA General Election-2023 ah khan BJP chu Mizoram hian hnawl tawh mahse, Lok Sabha election lo awm turah chuan Pu Modi-a team a tel ngei tur BJP MP thlang tura inbuatsaih a tul takzet a ni," a ti bawk.