Aizawl; State pawn atanga Mizoram a bung-raw phur lut tu, driver leh handyman te chu Covid an kai leh kai loh endik an ni lo a. Hetihlai hian Covid 19 thawh hnih-na thleng mek vang-in ILP hmang a Mizoram rawn lut an tlem hle.

State pawn atanga bungraw rawn phur lut tute Vairengte a Covid test neih tir an nih loh chungchang ah hian ZALEN zawhna chhangin Kolasib DC chuan, harsatna hrang hrang vangin test neih tir theih a ni lo tih a sawi a. Kolasib district ah chuan kawng laka an chawlhna tur hmun siam sak an nih thu sawiin, ei tur lo pe tur dawr bik te pawh siam sak an nih thu a sawi. Fimkhur thil ah state pawn atanga rawn lut bungraw phur tute reng reng positive ah ngaih a, lo hnaih chilh loh tur tih chu mipui an zirtirna a nih rualin, lo duat tur leh lo khawngaih turin mipuite an ngen tih a sawi bawk.

Vairengte SDO (Civil) Isaac C. Lalrempuia pawhin bungraw phur driver leh handyman te chu Covid an kai leh kai loh endik a harsa tih ZALEN hrilh in, test tur an tam thin avangin lirthei 400 atanga 600 inkar te a inhnawh khawm thin a, chu chuan kawng hrang hrangah harsatna a thlen niin a sawi. Hnam dang driver te pawhin Covid test neih an duh loh thu leh test neih ai chuan Mizoram rawn luh loh mai pawh an duh zawk niin a sawi bawk.

Bungraw phur ni lo, khualzin te erawh RAgT hmangin endik an ni thung a, ILP hmang a Mizoram rawn lut tur te pawh RAgT hmang a endik vek zel an ni. Vairengte SDO (Civil) sawi danin, Covid hrilen hma in ILP hmang a thla khat a Mizoram rawn lut zat chu chawh rualin mi 4000 bawr vel niin, tun dinhmun ah erawh chawhrualin mi 200 bawr vel chauh an tling.

Vairengte Police check gate thawktute hnen atanga ZALEN thudawn danin, tun dinhmun ah state pawn atangin Vairengte kaltlang a Mizoram rawn lut lirthei 300 atanga 500 bawr vel nitin an awm reng a, chung zing a lirthei 200 atanga 300 vel te chu bungraw phur niin, a bak chu khualzin phur leh lirthei veivak dangte an ni.