DOWNLOAD OUR APP

Read latest news on your phone
play-store app-store
app-store
Mizorama harhna thlen ni chungchang
titi ZALEN
Aug 25, 2019
  • C.Sangzuala
  • Mizo Kristiante hi harhna hlut kohhran kan ni a, chutiang kan nih avang chuan kan rama Harhna lo thlen hmasak ni chungchangah pawh kohhranin hun leh ngaihtuahna a seng nasa hle a ni. Presbyterian Kohhran Inkhawmpui lian Assembly (tunah Synod) tum hnihah vawi thum lai ngaihtuah phawt a ni (Assembly 1951 No. 18, 1952 Gen. 1 leh 21). Ngaihtuah hmasak ber 1951 Assembly chuan ni pawimawha neih a rem ti a, lung phun pawh a remti a, lungphunna hmun leh senso thu chu Standing Committee (tunah Synod Executive Committee) kutah a dah a. Ni serh bik atana an sawi chu April 4 a ni. He mi kum hian hman phawt an remti a.Hun kal zel tur erawh chu Bial leh Presbytery ten ngaihtuah theuh se, an thu chu Assembly-a la rel leh ni se an ti a (1951 Assembly No. 18). Kum 1952 Assembly-in lungphun leh a ni serh chu tul lovah a ngai ta thung a ni (Assembly 1952 Gen. 1 leh Gen. 21).
  • Kum tam tak a liam hnuin Khawchhak Presbytery chuan Mizorama harhna lo thlen hmasak ni Kohhran ni pawimawha hman rawtna hi 1981 Synod-ah a rawn thlen a. Synod chuan a remti a, a ni thu leh a hman dan tur chu Executive Committee rel fel turin a ti ta a (1981 Gen. 10). Synod Executive Committee chuan fimkhur leh uluk takin a ngaihtuah a, a ngaihtuah dan leh a rel dan chu 1982 Synod-ah a thlen a. Synod chuan fimkhur taka ngaihtuahin “Zoram Harhna lo thlen hmasak ni chu April 4, 1906 a ni e kan ti a. Zorama Harhna lo thlen hmasak ni, ni pawimawha kan puan tur chu April 4 a ni e kan ti” tiin a rel ta a - (1982 Gen. 33). Hei hi tun thlenga Mizoram Presbyterian Kohhran kalpui mek chu a ni ta.
  • Kumin (2019) Presbyterian Kohhran Puitling Sande Sikul zirlai 31 (August 25) thupui hi ‘Harhna thlen thu leh a kaihhnawihte’ tih a ni a, zir chakawm tak a ni.
  • Kumin Puitling Sande Sikul Zirlai 31-na (pp 148-149)-ah chuan then 1-na Mizo Kristiante zinga harhna thupui chhungah, “….Chhim lam Kohhran atangin mi pathum leh Hmar lam Kohhran atangin mi pasarih chu kum 1906 March 15—18-ah Assembly Mairang-a awm chhim turin leh harhna puak chhuah beiseiin Siniboni hovin an kal a. An lo haw chu April ni 4-ah Aizawl an thleng a. April ni 9 zingah Chhim lam palai Serkawna haw turte chu Sikulah an thlah a. Inthlahna inkhawmah chuan hla an sa tawp hlei thei lo va, darkar li zet a awh ta a. Chhim lam palaite pawh haw thei ta bik lovin zan lam thlengin an inkhawm chhunzawm a, harhna a thleng a ni ta reng mai….” tia ziah a ni a.
  • Mizoram Harhna lo thlen tanna hetiang ngawta kan zir chuan Harhna lo thlen hmasak ni chungchanga Inkhawmpuiin hun leh ngaihtuahna a lo sen zawng zawng leh Inkhawmpui Rorel thu tlu te a hliah vek thei mai awm e. Harhna lo thlen hmasak ni hi a hmun nen a inkawp tlat a. Khasi rama Harhna chhima kal, an lo hawna Chaltlang khaw chhung mel 2 dinna bula an chawlh laia chung lam atanga thil danglam an chunga lo thleng chu Synod Inkhawmpui chuan uluk taka a zir chian hnuah pawm tlaka ngaiin harhna lo thleng hmasaah pawmin kan hmang chho a ni a. Sande Sikul Zirlai bu hi chuan Harhna thlen ni leh a hmun a sawn dawrh ni berin a lang. Zirlai bu ziaktute leh a lo enpuitute tan, nghahchhan leh kaihhnawih nei thilah bik hi chuan fimkhur a pawimawh viau a ni.
  • Keini ang rual rawngbawlnaa kan inhman ve tak tak hma khan hranghlui mi tuiten April ni 4-a thil thleng hi an ngaisangin an tuipui hle a. Kohhran puihna pawh tel lovin a hmunah hian BETHEL lung hi kum 1964 khan an phun a. Mairanga kalte zinga la dam awm chhun Rev. Zathangan 1964 April ni 4 khan a hawng a. Lungphun hawnna inkhawm hi chutih laia kan hruaitute zinga mi Rev. Sakhawliana’n a telpui nghe nghe a ni.
  • Harhna hmasa thlenna hmun leh lungphun chungchang hi sawi zui hlek ila. Hun kal zelah he thil buaipuituten a mawhphurhna hi Chaltlanga an member awmte kutah an dah a (4.4.1974). Anni pawh hian KTP kutah an hlan ve leh a (21.6.1999). KTP pawh chuan ni 14.9.1999 khan Chaltlang Kohhran kutah a hlan ve leh chhawng a. Hun a lo kal deuh va, Chaltlang South Kohhran a lo ding a (24.11.2002). Kohhran pahnih chuan a enkawltu Sub-Committee siamin, chinfel ngai leh a lungphun din thatah mawh an phur a, loh theih lohna avangin a thar hlaka din thain Bethel lungphun thar chu ni 30.5.2004 khan Pathian hnenah urhsun takin an hlan ta a ni - (Harhna pp 261-262).
  • Mizoram Synod Inkhawmpui 2005 pawhin Presbytery thar eng emaw zat a siam khan he Bethel hual veltu Pastor Bial li huamin Presbytery thar a siam a, a hmingah pawh ‘Aizawl Bethel Presbytery’ tih a hmang. - (2005 Synod Gen. 50 Appendix 3).
  • 1906 April 9-a Mission Venga hlimna lo alh chhuak hi a ngaihtuah thintu Committee leh Inkhawmpui palaiten an hai lo va, mah se a bul intanna, harhna meichher deh kaina April 4 hi Harhna thlen ni hmasaah pawm a ni ta a ni.

Latest News & Chhiar Hlawh