Mizoramah Kristian Thalai Pawl (KTP) member nuaikhat chuang an awm mek a, Baptist, Salvation, UPC leh Kohhran dang thalaite nena belhkhawm vek chuan Kristian thalai hi Mizoram pumah mi nuai 5 dawn an awm awm e. Heng Kristian thalaite hian hmathlir dik an neih phawt chuan an bawh lam chu a êng kawk kawk zel thei hialin a rinawm. Heng Kristian thalai rualte hian Mizoram hma lam hunah mawhphurhna sang tak an nei tih an inhriatchian a pawimawh hle a, chumi tihlawhtling tur chuan theihtawp an chhuah a tul hle bawk. Thalaite tel lo chuan thil a tih tak tak theih ngai loh. Tunlaia KTP Inkhawmpui Lian, Khawzawla neih mekah pawh thalai tamtak an fuankhawm a, Pathian fakin an chawimawi piah lamah, tih tur pawimawh tak tak relin hmachhawp ropui tak tak ruahman a, heng an hmachhawp hrang hrangte tihlawhtling tur hian theihtawp an chhuah leh dawn a ni. KTP hian Youth Recreation Centre din turin a rel a, Mizo thalai, hna leh zirna avanga Mizoram pawna chhuakte, hna leh zirna him tawk lo laka an fihlim theih nan leh harsatna nasa zawk an tawh loh nan hetiang lama fimkhur a tulzia inzirtirna lamah hmalak a ni dawn bawk. Mizo thalaite mamawh em em, thalai eng emaw zatin harsatna an tawh thinte sutkian a nih theihna tura KTP hmalakna tur hi a lawmawm a, a nghahhlelhawm bawk. A zar zotu tur chu thalai chauh ni lovin Zoram mipuite an ni dawn a, heng hmachhawp tha tak takte an tihhlawhtlin theihna tur hian Kohhran piah lamah sorkar, NGO leh mipuiten an thlawp that a tul hle dawn a ni. Mizorama Kristian thalai pawl hrang hrangte hian rawngbawlna kawngah an thawhhlawk em em a, sum pawh an thawkchhuak hnemin, kum telin sum thawhchhuah a pung a tih theih. Hetianga sum tam tak thawkchhuaka rawngbawlna an kalpui avang hian thalai tam takin hma an sawnin, sual bawiha tangte pawh chhanchhuah an ni tawh thin a, chhanchhuah an ni mek a, an la chhanchhuak zel bawk turah ngai ila. Chutih rual chuan, rawngbawlna tura sum tuak dan tawk chin erawh chu hriat a pawimawh thung awm e. Hmun thenkhatah chuan an din chhan leh thil tum aiin sum tuak lamah thahnem an ngai zawk emaw tih mai palh theih khawpa thahnemngai lutuk a awm thei a, fimkhur a tha hle. Sum lakluhna kawnga thahnemngaih lutukna lamah mite mit tikham palh awm thei laka inven leh inenfiah fo a tha hle ang a. Sual bawiha tang laklawh leh humsual daite chhanchhuah kawngah nasa lehzualin thalaite hian ke pen deuh deuh se, chutih rualin mi dangte vei viaua, mahni lama entawn tur awm mumal lote pawh a awm theih tih hriain, entawntlak, zuitlak, nun awhawm, mi dangte tana malsawmna nih kawngah Kristian thalaite hian nasa zawkin ke pen zel sela, chu chuan ram leh mipuite tan pawh malsawmna ropui tak a thlen ngei a beiseiawm a ni.