Aizawl August 25, 2024 : Mizorama let duh lo, Tripura-a inbenbel thlang Bru chhungkua 6,959-te chu Mizoram electoral roll atangin paih fel an ni tawh a, Bru-te hi Tripura district pali chhunga khaw 13-ah an inbengbel mek.

Mizoram Bru Displaced Peoples’ Forum-a an hruaitu ni thin, Bruno Msha hnen atanga ZALEN thudawn danin, Tripura-a inbenbel thlang Bru-te hi Tripura sawrkar kaltlanga sawrkar laipui hmalaknain khaw hrang hrangah an awm mek a, hetihlai hian an inbenbelna tura hmalakna a chak tawk loh avangin harsatna hrang hrang erawh an tawk.

Msha sawi danin Tripura-a inbengbel mek Bru chhungkua zaa 60 bawr vel chauh chin fel an la ni a, a bak zawngte chuan an inbenbelna tura Tripura leh sawrkar laipui hmalakna an la ngaichang.

“Kan inbenbelna tur khaw hrang hrangah khaw dinna tura pawimawh - link road, tui, school, bazar hmun tur, community hall etc. te tihfel loh a la ni a, hmalakna a kal mek nain, duh ai chuan a muang,” a ti.

Bru-te hi Tripura district pali chhunga khaw 13-ah awmtir an ni dawn a, an vaiin chhungkaw 6,959 an ni a. Hetihlai hian official-a hriat si loh, an chhungte bela Mizorama let leh thenkhat erawh an awm rin a nih thu Msha chuan a sawi.

Msha sawi danin Tripura-a inbengbel Bru-te chu Tripura electoral roll-ah thun fel an ni vek tawh a, Mizoram electoral roll atangin paih vek an ni tawh bawk.

January 16, 2020 khan Ministry of Home Affairs, Mizoram sawrkar, Tripura sawrkar leh Bru hruaituten Mizorama kir duh lo Bru-te Tripura-a inbengbel turin inremna (agreement) New Delhi-ah an lo ziak tawh a, chumi ang chuan Mizorama let duh lo Bru-te chu Tripura-a inbengbel turin hmalak a ni.

May 21, 2010 atangin Bru-te Mizorama lak let hna tan a ni a, kum 2010-a agreement ziah thlengin Bru hruaikir hna vawi kua thawh a ni.

Bru leh a kaihhnawih :

• October 21, 1997-ah Persang khaw bulah Lalzawmliana, game watcher kah hlum a nih avangin Bru eng emaw zatin Mizoram an chhuahsan.

• November 13, 2009-a Bru Revolutionary Army nia inchhalten Zarzokima, Bungthuam khua an thah avangin Bru eng emaw zat Tripura-ah an lut.

• Mizoram chhuahsan Bru-te hi Tripura-a refugee camp hrang hrangah awmtir an ni.

• Bru-te hi Mizorama hruai kir hna vawi kua thawh niin, a hnuhnung ber chu October 3, 2019 atanga November 30, 2019 chhung neih a ni.