Aizawl March 31, 2024 : Mizorama oil leh gas zawngtu company-ten hna an thawhna man sawrkara an chhun luh tawh zat chu Rs. 36,41,17,996.36 a ni a. Mizoram chu oil/gas bakah lungalhthei (coal) haichhuah/laihchhuah tur awma ngaih a ni.

ZALEN RTI zawhna, Geology & Mineral Resources Department SPIO-in a chhanna atanga a lan danin Mizorama oil/gas zawng tur company pathum - ONGC, Oil India Ltd. (OIL) leh The Vedanta Ltd. te hna pek an ni a. Heng company zingah ONGC-in sawrkarah sum an chhunglut hnem ber a, ONGC I sum chhunluh hi Rs. 14,29,81,007 niin ONGC II sum chhunluh hi Rs. 74,33,682 a ni. Oil India Ltd. chuan dawtin Rs. 18,14,43,345.36 an chhunglut a, Naftogaz-in Rs. 3,22,03,362 leh The Vedanta Ltd.-in Rs. 56,600 an chhunglut bawk.

Mizorama oil zawng tura hna pek zinga mi, Naftogaz erawh an permit cancel sak an ni.

Mizorama oil zawngtute chuan chan an insem tih sawiin ONGC-in Mizoram hmar lam block changin kum 2003 atang khan Exploratory well, Zanlawnah leh Meidum-ah an verh tawh a. Zanlawn well-ah hian oil/gas hmuhchhauh a ni lo a, Meidum well-ah erawh gas signature hmuh niin economically viable a nih leh nih loh finfiah nan well dang Hortoki-ah verh leh tura hmalak mek a ni tih a sawi.

OIL hian Mizoram laili changin exploratory well Maubuang, Keifang, Thenzawl leh Phulmawiah te verh tawhin oil/gas hmuh a ni lo vek a. OIL hian Pangzawl-Thiltlang area-ah well pakhat verh leh tumin hma an la mek a. Hemi atana approach road NH-02, Aizawl – Tuipang hi widening hna thawh mek atang hian OIL-in an verhna hmun tur hi pengin, thleng tur hian approach road hi siam tum mek a ni a, chumi piah lamah chuan drill site siamna tur civil work pawh tender process pawh a kal mek tih SPIO chuan a sawi a. The Vedanta Ltd. hian Mizoram hmar tawpah block neiin tun thlengin oil/gas well verh an la nei lo a ni.

Mizoram leilung hausakna haichhuak tura hma la tawh company zingah Naftogaz India Private Limited bân/chawlhtir an ni tih sawiin SPIO chuan Naftogaz India Private Limited hian Naftogza, Ukraine phalna la hmasa lo leh dik lo taka an business reputation leh experience an lo hmansak avangin Ministry of Petroleum & Natural Gas-in Mizoram-a an Petroleum Exploration Licence an tihtawp (terminate)-sak tih a sawi.

Meidum bula ONGC in gas an hmuhchhuah lakchhuah a la nih loh chhan sawiin, 'Meidum bulah ONGC in gas an hmuchhuak tih hi a dik a. Well Hortoki#1 HO#1(HOAB) ah hian gas hi 5,52,674 Standard Cubic Feet/Day (SCFD) hmuh a ni a. Well pakhat verha gas hmuh hian leihnuaia a tam zawng (oil/gas reserve) bakah economically viable a ni em tih hrechiang turin a bul hnaiah well pakhat (appraisal well) verh leh tura hmalak mek a ni,' a ti a. ONGC in oil/gas khur an verh lehna hmun tur approach road hi PWD, Govt. of Mizoram in hma an la mek a. Hemi panna tura pawimawh tak bridge construction hi rokhawlhna hrang hrang vanga zawhfel a la nih loh avangin ONGC hian oil/gas verh hi an la tan thei lo tih RTI chhanna ah hian tarlan a ni.

Lei hnuaia gas/oil te hi laihchhuah loha a awm reng hian ram/hmundang oil khur atangin hip/ruk theih a ni em? tih chungchangah Directorate of Geology & Mining hi oil/gas zawnga verhtu a nihloh avangin gas/oil te hi laihchhuah loha a awm reng hian ram/hmundang oil khur atang hip/ruk theih a ni em tih zawhna hi fiah fai takin a chhang thei lo a. Oil/gas te hi leihnuai petroleum system (source rock, migration pathway, reservoir rock, trap and seal etc.) awm nih mai bakah chumi a petroleum trap (anticline, syncline, fault, stratigraphic trap etc.) chi hrang hranga lung kar pore spaces a awm a ni a. Mizoram chhung hi fault leh folds ten a tan tlang nua la. Hengte hi dangtu (trap) ah pawh tang thei tura ngaih an ni a, hengte a nih avang hian ram/hmundang oil khur atangin hip/ruk theih a nih a rinawm loh tih an sawi.