ZALEN August 23, 2026: Mizoramah kum tin sangha thar a pung hret hret a, hetih lai hian phai lam atanga lak luh erawh a la tamin kum khatah quintal 12,537.60 la lut anga chhut a ni.

Fisheries department chhinchhiah danin sangha hi kum 2021-ah quintal 47,575.50, 2022-ah quintal 52,298.50, 2023-ah quintal 54708.92, quintal 2024-ah quintal 71,520.6 leh kum 2025-ah quintal 80,200.00 thar angin an chhinchhiah a ni.

Mizoram sangha thar hi a pung hret hret tih sawiin department thawktute chuan, “Hripui (Covid-19) khuahkhirna avangin kum 2020 leh 2021-ah sangha tharchhuah a tla hniam hle a; mahse, fisheries department hmalakna hnuaiah kum tin Mizoram sangha tharchhuah pung chho ve lehin hma kan sawn leh tawh a ni,” an ti. 

Mizorama sangha dil awm zat leh a zau zawng zawhna chhangin kum 2025 thlengin department chhinchhiah danah chuan Mizoramah dil 22,661 siam tawh niin a vaia belhkhawm zau zawng hi hectare 5,888.08 anga chhut a ni tih an sawi a. Mizoram pumah dil siam theihna hi hectare 24,000 vel awm anga chhut a ni a, hectare 6,367.58 (26.5%) siam tawh anga chhut niin siam belh theihna hi hectare 17,632.42 vel la awm anga chhut a ni. 

Fisheries department-in sangha khawitu/ dil siamte tana an hmalak tawh dan leh hmalak meknate sawiin dil siamna tur hmun neite hnenah scheme hrang hrang hnuaiah sangha dil siamna tur tanpuina pek thin a ni a. “Hmun nei tha leh sangha dil siam eizawnna atana hman tum tak takte tanpui chhoh zel tum a ni,” an ti a. 

Sanghaa Mizoram a la intodelh loh chhan leh intodelh tura hmalak dan chungchang ZALEN zawhna chhangin state dangah hectare khat atanga sangha thar chhuah (unit area productivity) chu quintal 30-40 vel a nih tawh laiin Mizoramah chawhrualin quintal 10.03 vel chauh la thar chhuak ang a ni a. Hei hi a chhan ber nia lang chu sangha dil enkawl dan la thiam tawk loh vang te, hlawk tham tura eizawn nana hmang tak tak an la tam loh vang leh sangha chi leh sangha chaw duhkhawp la hmuh loh vang te a ni ber tih an sawi. 

Sanghaa intodelh tura department hmalakna sawiin centrally sponsored scheme leh State Flagship Programme ‘Bana Kaih’ hnuaiah Fisheries hmasawnna turin kawng hrang hranga hmalak chhoh mek a ni a. Unit area productivity tipung tur hian department chuan fish farmer-te zirtirna (training) pek a pawimawhzia hriain sangha dil siam atanga enkawl dan te, a man dan thlenga nasa zawk leh mumal zawka training pek theihna na hmun tur NEC hnuaiah ‘Fish Farmers Training Centre’ Lengpui-ah a siam mek. 

Mizoram hmun tinah sangha chi (fish seeds) kan mamawh ang kan hmuh theihna turin district tinah hmun nei tha leh hlawhtling ngei tur te hnenah Hatchery siamna tur tanpuina pek tum a ni a. Dil thar siam (new pond construction) lamah pawh Department chuan kalphung thar siamin zau takin dilna thehluh hun a hawnga a, heng dilna lut te hi a hmunah endik vek tura ruahman niin, site assessment hi a tah tawla kalpui chhoh mek a ni a. 

Central scheme atanga sum hmuh dan azirin heng assessment tih tawh te hi kum khatah tuam vek theih anih loh pawhin kum dangah pawh rin chhoh zel theih tura ruahman a niin pond construction atanga marketing thlengin mumal zawka kalpui anih theih nan a theih chin chinah cluster (zau) based a kalpui chhoh tum a ni, an ti a. Hei bakah hian dil atanga sangha tam zawk thar anih theih nan Composite fish culture (sangha chi hrang hrang khawi pawlh) nasa zawka kalpui tum a nih bakah dil tam takin an rin tui hna hi ruahtui tlak dana innghat a ni a, kan ramah tuihna a kiam mek zel a, dil tam takah tui tlin hun chhung a rei loh thin avangin sangha an thang lian hman lo thin a, chuvangin sangha thang chak chi Amrit Catla, Amur Carp, Jayanti rohu etc. te lakluh tum a ni tih an sawi bawk.

Zawhna chhangin Fisheries department thawktute chuan Mizoram leilung/sik leh sa hi sangha hian an ngeih tih sawiin Mizoram khawi lai pawh hi sangha khawi nan a tlak vek a, tui hna awm that dan leh dil enkawl that danin a hril thui hle tih an sawi a. Kolasib leh Mamit district atang hian Mizoram sangha tharchhuah chanve deuh thaw hi thar a ni tih sawiin hei hi a chhan chu sangha dil siamna hmun rem a tam bakah eizawnna tak taka hmang an tam ber vang a ni tih ZALEN an hrilh bawk.