Aizawl: Hripui leng avang leh lockdown avangin Mizoramah a thlawna thisen pek 
‘voluntary blood donation’ a tlahniam nasa.

ZALEN-in Association for Voluntary Blood Donation (AVBD) President 
C.Lalnunnema hnen atanga thu a dawn danin kumin 2021-22 April-June (1st Qtr) 
chhunga a thlawna thisen pek (voluntary donation) hi Mizoram pumah 88.5% a ni 
a, nikum April-June chhung khan 93% a ni. A thlawna thisen pek hi a tlahniam 
mêk a, thla thum kalta chhunga thisen pek unit 5372 atangin thlawna pek hi unit 
4754 a ni.

July thla chhung hian ACH blood bank hian  donation camp vawi 3 
neih niin camp atanga hmuh hi unit 132 a ni a. Durtlangin camp vawi 1 neiin unit 
39 an hmu a ni.

AVBD President C.Lalnunnema chuan hripui len hma kha chuan a 
thlawna thisen pek hi thisen lak zawng zawng atanga chhutin 90% chunglam a ni 
zar zar tih sawiin tunhnaiah erawh a thlawna thisen pek hi a tlahniam hle niin 
ZALEN a hrilh a. "A thlawna thisen pek a tlakhniam chhan ber hi hrileng (Covid-
19) vang leh lockdown vang hi a ni ber" tiin a sawi.

Blood bank a thisen khawlsa a awm loh chuan rikrum thilah harsatna a 
thleng thei tih sawiin C.Lalnunnema chuan, "Accident emaw emergency thila zai 
te an awm palhin thisen dahkhawl a awm loh chuan thisen petu zawn chawp a 
ngai thin a, rikrum thilah phei chuan a buaithlak hle a ni," a ti a. "Hri lêng avanga 
inkhuahkhirh chhung pawhin thisen pek runpui a huaihawt theih a, mimalin blood 
bankah thisen a pek  theih reng bawk," a ti a.