Aizawl: Nimina Council of Ministers thukhawm chuan chuan May ni 17,2020 thleng lockdown (inkharkhip) kalpui an rel a. Indian Railways in phalna a pek angin, Mizoram mi leh sa, state danga tangkhangte an lo haw ve theih dan tur ngaihtuahsak an remti bawk.
Chief Minister Zoramthanga hova Council of Ministers thukhawm chuan COVID-19 avanga lockdown kalpui mek chu India sawrkarin a lo tih angin Mizoram tan kar hnih dang, May ni 17,2020 thleng la chhunzawm ve ni se tiin a rel a. Lockdown kalpui chhunzawm a nih chhunga inkaihhruaina tur te he meeting ah hian an sawiho a. Council of Ministers thukhawm chuan hripui leng kara mipui him tlanna tura sawrkar thuchhuakte tha zawka zawm a nih nan Health & Family Welfare Minister in Ordinance for Containment and Prevention of COVID-19 tih a chhawp chu sawiho niin an pawm a. He Ordinance hnuaiah hian mipui himna tura khapna thupek bawhchhetute hrem theih dan te sawifiah a ni.
Council of Ministers thukhawm chuan sawrkar laipuiin mahni state ni lo a tangkhangte anmahni state a hruai haw nan Indian Railways-a phalna a pek angin, Mizoram mi leh sa state danga tangkhangte pawh an lo haw ve theih dan tur ngaihtuahsak an remti a ni.
Meeting-ah hian Manipur leh hmarchhak state dang atanga tunhnaia tangkhang lo haw te chu sawrkar atanga a hrana puihna phut miah lova an lo haw hlawm chu fakawm an tih thu an sawi bawk.
Council of Ministers meeting-ah hian Chief Minister Zoramthanga, Deputy Chief Minister Tawnluia leh minister dangte an kim vek a ni.