Aizawl; Mizoramah pianphunga rualbanlo 7894 an awm a, heng te hi taksa sawngnawi (Orthopaedically handicapped) 2360, rilru lama harsatna nei (Mental retardation) 1874, khaw hmuh fiah lo/mit tha lo (Visually impaired) 1436, beng thalo (Hearing impaired) 1996 leh thildang vanga rualbanlo (Multiple disability) 228 te an ni. Commissioner, Persons with Disabilities B.Sairengpuii chuan Mizoramah rualbanlo ten ngaihsak an la hlawh tawklo chu pawi a ti hle tih sawiin, 'Sawrkar Building hrang hrangah rualbanlote kal vena tur Ramp, railing bakah an inthiarna tur bik (adaptation toilet) a awm vek tur a ni,' tia Aizawl Municipal Council leh PWD ten hriattirna an tichhuak chunga department ten an ngai pawimawh tawklo chu pawi a ti hle tih a sawi a. Ramps, Rails leh Adaptation toilet siamna tur pawisa hi kum 2010-11 ah nuai 20, 2011-12 ah nuai 20 leh 2012-13 ah nuai 30 te Central sorkarin a rawn pe tih sawiin, hengte hi office hrang hranga hman tur a ni a, office hrang hrangte hian ngai pawimawh hram se a duh hle tih a sawi bawk. PWD Commissioner chuan rualbanlote tana sawrkar hna hausak thin 3% pawh tisang turin sawrkarah an thlen tawh tih Zalen palai a hrilh bawk a, "Rualbanlote tan 3% sawrkar hna hauhsakna hi kum 2007 ah bultan a ni a, hei hi kum 3 danah ennawn tur tih anih laiin ennawn a la ni lo a. Deptt. hrang hranga an hnathawh theih tur (identified post) pawh sawrkar hian chhuah tha leh thuai se kan duh hle a ni," a ti bawk. Rualbanlo ten kan hma lawk Lok Sabha inthlanah vote an thlak ve tawh ngei nan remchanna siamsak turin thuneitute an ngen nawn leh tih PWD Commissioner chuan a sawi a. Supreme Court-in Polling Station chu rual-banlote luhtheihna tur (ramp facility) a ni tur a ni, a ti a. Election Commission pawhin pianphung rualbanlote chu Polling Station-ah pawh intlar ve lovin, vote thlak tir zel tur a ni, a ti a. Mitdel te pawhin vote an thlak ve theih nan Braille marking siam tur a ni bawk a. Heng zawng zawngte min ngaih pawimawh sak tur hian Chief Secretary leh Chief Electoral Officer, Mizoram te chu kan ngen a. Mahse kan ngenna hi MLA inthlanah khan ngaih pawimawh a ni lo a, MP inthlan hunah chuan min ngaih pawimawh sak ngei turin January 23, 2014 khan an ngen nawn leh a ni, a ti bawk.