Aizawl December 23, 2023: Vawiin khan Chief Minister Lalduhoma chuan a pisaah Rubber Board of India Chairman Dr. Sawar Dhanania leh a thawhpuite nena inkawmna an nei a. Mizorama rubber tharchhuah tihpun dan tur te an sawi dun.

India ramah rubber chinna hmun hi INROAD Project hmangin hactare nuaih 2 a zau siam belh tum mek a ni a, Mizoramah pawh kum 2021- 25 chhunga hactares 9000 target a ni a. Mizoramah tunah hian rubber hactares 6770 a zauvah chin tawh a ni a, la chin belh theihna ram a neih zawng zawng chu Hactares singnga a zau a la ni.

Tunah hian Rubber hnai thei tawh chhungkua 3000 chuang Mizoramah an awm mek a, an zinga a tam zawk hian hmanrua an mamawh ang te an la neih kim loh avangin chhungkaw 400 vel chauhvin an la hnai thei niin Mizoram Rubber Society hruaitute chuan an tarlang. Heti chung hian kum tin Metric Ton 1460 chuang an thar tawh niin sawi a ni a, a hnai thei tawh zawng zawngten an hnai vek hunah chuan nasa takin Mizoram rubber tharchhuah hi a pung dawn a ni.