Aizawl; Mizoram chuan Medical College a nei thei dawn ta a, Medical College thar din phalna/remtihna hi Ministry of Health and Family Welfare chuan Mizoram sorkar hnen- ah March ni 3, 2014 khan (lehkha No.D.O.U. 12012/46/2012 - ME (P.II) dt.19.2.2014 kaltlangin) hriattir a ni a, a senso tur hi Central sorkar leh Mizoram sorkar intum- sem tur a ni. Medical College hi State Referral Hospital, Falkawn-ah bun tura ruahman a ni a. Central sorkar hian zaa sawmkua (90%) a tum ang a, a bak chu Mizoram sorkarin tum ve a ngai dawn a ni. Central sorkarin sum a tum tur hi cheng vaibelchhe 189 a ni dawn a, Medical College dinna tura bawhzui ngai awm apiangte chu Mizoram sorkarin chak taka umzui nghalin, Medical College hi din thuai a nih theih nan hma a la nghal dawn tih nimina Mizoram sorkar thuchhuah chuan a tarlang. Mizorama Medical College dinna tur hian Chief Minister kaihhruaina hnuaiah Committee din a ni a, hemi tih-hlawhtlin nan leh DPR siamna turin NEC-ah ‘Support for Preparation of DPR of Mizoram Medical College’ chu kum 2011–2012 chhunga sanction turin dilna thehluh a lo ni tawh a ni.