ZALEN, Apr. 23, 2026: June 22 atangin hmarchhaka rawlthar kum 19 hnuai lam basketball inelna, Northeast Elite Basketball League Season 1 chu Aizawlah khelh tan a ni dawn.

Hmarchhaka rawltharte tana basketball league buatsaih tur chungchang hi a buatsaihtute leh inelna thlengtu tur, Mizoram Basketball Association (MBBA) hruaituten Ningania Aizawl Press Club-a thuthar lakhawmtute an kawmnaah an puang a ni.

Inelna hi Aizawla basketball uar veng bik 10 - Bungkawn, Chaltlang, Chanmari, Chawnpui, Dawrpui, Nursery Veng, Saron Veng, Tuikual South Zarkawt leh Zemabawk-a innghat team (franchise) inelna tur a ni.

Team tina player-te hi player chhawp chhuah atanga lak khawm (draft pick) tur a ni a. Player lak khawm turte hi team behchhan vengten a tlem bera player pali an thawh leh hmarchhak state dang pasariha player 10 theuh an ni dawn a. Hengte hian trial an nei ang a, heta tang hian team hian an thlang chhuak dawn a ni.

Team 10-te hi pool pahnihah panga ve vea thenin an inkhelh kual dawn a. India rama state pakhat aia tam telna junior basketball league lian ber pawl tling tur a ni ang.

A hmunah inkhel hi man chawia en theih a nih dawn bakah TV leh YouTube atanga en theih tura chhawp chhuah tum a ni bawk.

MBBA-in a thlen tur Northeast Elite Basketball League season hmasa ber hi R. Dengthuama Hall, Mualpuia khelh tura ruahman a ni a, ni 10 vel chhunga khelh zawh tur a ni ang.

Champion teamin Rs. 1,50,000, pahnihnain Rs. 75,000 leh pathumnain Rs. 50,000 an dawng dawn a. Season 1 atan bik hian a buatsaihtute chuan Rs. nuai 40-45 vel an ruahman.

Inelna hi season nga chhung MBBA hian an thleng tura ruahmanna siamsa a ni a, a hnu lam zel chu state dangah pawh a tul anga nghah a ni ang.

League hi ABC Basketball Development League Private Limited leh ACG-in an buatsaih tur a ni a. ABC hi Pune-a hmunpui nei, Maharashtra Basketball League pawh an buatsaih mek an ni.