Aizawl May 17, 2023 - Mizo Zirlai Pawl (MZP) General Headquarters, Aizawl chuan vawiin khan Vanapa Hall-ah High School Leaving Certificate (HSLC) Examination 2023 Top 10-a Mizo tlingte chawimawina hun a buatsaih a, Khuallian Mizoram Chief Minister Zoramthanga chuan Mizote khawvel hmaa ti zahawmtu ber chu hnam movement a kalpui ngam kha a nih thu a sawi.

Khuallian Zoramthanga chuan thu sawiin, Zirlaite chu an zirlai tibuai thei hrang hrang lak atanga fimkhur turin a fuih a. Ruihhlo, zuk leh hmuam leh thlemna hrang hrang do hneh turin Pathiana innghat tlat turin a chah. Zirlaite chu vawi khat hlawhchhamnaah beidawng lo turin leh hlawhtlin hma chu bei nawn turin a duh thu a sawi. 

Chief Minister chuan ram leh hnam chungchang sawi zawmin, “Pathian-in ram min pe a, ram leh hnam hmangaihna rilru Nationalism nen a venhim hna hi kan kuta awm a ni. Mizote khawvel hmaa min ti zahawmtu ber chu, kan ram leh hnam chhan tura bei ngam, hnam movement kalpui ngam kan nihna hi a ni a. Hei hian khawvelah hnam zahawmah min siam a, kan nih phak loh min nih tir nasa hle a ni” a ti.

MZP President Lalnunmawia Pautu chuan, HSLC a result tha tak neih hi hlawhtlinna a la ni lova, hmabak an neihte theihtawp chhuaha bei turin a fuih. MZP President chuan “Manipur buaina avanga MZP-in kan unaute thlavang a hauhna kawngah selna a tawk nasa hle a, Manipur buaina hi MZP thuchhuah avanga lo thleng ni lovin, ruahman lawk a ni. Chuvangin, MZP chuan kan unaute harsatna tawh hi a harsatnaah a ngai a, a tawp thlengin an tan a ding zel dawn a ni” a ti.

Lalnunmawia Pautu chuan, “MZP hi hman atang tawhin a dinna a ngai reng, MLA election-ah hnamdang nupui pasal neite candidate-a dah lo tur leh hnamdang Minister-a dah lo tura Party a ngenna chuan tun hnaiah sawi a hlawh thar hle a. Hei hi ngaipawimawh turin party hrang hrang ka ngen nawn a. Hei hian ngaihpawimawh a hlawh lo a nih chuan, kan hnam kal zel turah hnam dang nupui pasal neih kawngah pawi tih lohna kan nei ang tih kan hlau a ni” a ti.  

Vawiin-a HSLC 2023 Top 10-a Mizo tlingte chawimawina hunah hian, Top 10-a lang mi 17 zingah Mizo zirlai 14 te chu chawimawina hlan an ni a. HSLC 2023 Top 10-a Mizo zirlai tling 14 zingah hian Mipa 2 niin, Hmeichhia 12 an ni.

Zirlaite hi chawimawina thuziak, tangkafai cheng sang nga (5,000), Lalhmachhuana Zofa lehkhabu ziah 'Mizo History - Khua',  Zirna Lamtluang lehkhabu, ZOFEST 2022 hriatrengna lehkhabu 'Lailun' te pek vek an ni.

He hun hi MZP General Headquarters Vice President Andrew F Lalramnghaka'n a kaihruai a, Central Kristian Thalai Pawl (Central KTP) Leader Rev. Dr. F. Pachhunga'n hunserh a hmang a, GIG Motors CEO John Lalpeka'n thu a sawi bawk.