Mizote hi a nawlpui a ringtu kan nih atangin kum 120 chuang emaw a liam ta a; Mizoramah hian Kohhran hrang hrang 100 vel emaw kan awm tawh bawk a. Mizo nawlpuiin kan zawm kohhran erawh kohhran 10 vel chinah a thlurbing theih ang a; a dang te chu kohhran member ngah lem lo leh member ngah loh avanga buai chuang lemlo te pawh an ni thei bawk ang. Tin, kohhran huanga inchhiar lo pawl ram chhuahna lam tuipui tu te leh ho nei pawl te pawh an awm ve bawk. Mizote hi inlenpawh hnam leh thenrual tha siama khawtlang nun mawi tak zawm dual thin kan ni a; Zawlbuk nun te kha a khawtlang anga inkaihhruaina tha min neih tir tu pakhat zawng a ni ngei mai. Kristianna kan hmelhriat atanga hun rei vak lo ah kum 1935 a lo nih chuan vawiina YMA ni ta hi a lo piang ta bawk a. Chu chuan kan Mizo nunphung hrim hrim hi a tha zawng leh kan nundan pawh a mawi zawnga min kawihherna hi chhinchhiah tlak a tling a. Hei tak hi hnamdang ten Mizo khawtlang nun zirchianna an rawn neih changa; mak an rawn tih thin reng chu a ni. 

Awle, kan thupui ah lut dawn ila; Mizote kan zavai maia kan vanneihna em em chu khawtlang anga min phuarkhawmtu tha YMA kan nei tlat leh Kohhran kan nei hi a ni. Vawiinah chuan kan Kohhran te pawh a inhawngzau hle a. Kohhran mi zawng zawng huap vantlang Pathian Biak Inkhawm kan neih bakah; Thalai pual, Hmeichhe pual, Pavalai pual inkhawmna a hrang hunbi nei a kan neih bakah Naupangte pawh sunday school an kal hnuin; a te deuh te tana a nawlpuia inkhawmna pual bik leh a lian deuh tan tleirawl chawhnu inkhawm a buatsaih bawk a. Tin, Thalai pawl te pawhin an hun bika thalai inkhawmna piahlamah fellowship hun te buatsaihin; chumi piahlamah intihhlimna leh thalaite tel ve na tur remchang hi a dap awl lova; Zo zan tih a hnam inchei a inchei zan te hial siamin; thalai pawl pakhat phei chuan kum khatah vawi 1, Biak In pawn ah Karaoke Nite hial te buatsaihin; thalaite nuam tihna tur ber leh an hlimna tur a zawnsak hial. Kohhran thenkhatah phei chuan naupang atanga thalai pawla an inhman hma a bo hlen ta awm thei te vengin Junior Thalai Pawl te an tan a la buatsaih sak leh ta thin bawk a. Kohhran thenkhatah chuan kum 60 chin chunglam te ngaihtuahtu pawl te insiamin; Biak In chhung leh pawn lama ei leh in buatsaih nikhua ten an tan thutna bik te siamsakin kawng tinrengah duhsak an hlawh a.

Tin, kum lama upa an nih vang ringawtin kohhran chuan Krismas leh Kumthar pual ten kum 70 emaw kum 80 chin chunglam chawimawina te a buatsaih sak thin tih kan hria a ni. A nihna takah chuan Kohhran hian nausen ka nih atanga tarkun khupbih ka nih hun thleng hian ka tel ve na theihna tur hmun remchang tak hi min siamsak mawlh mawlh a. Kohhran hian engtikah mah ka penbo hi a remti lo bur a ni. Damloh leh chhiatni thatni ah min la ngaihtuah zui em em bawk a; kohhranah hian ka tel ve na tur chi a awm lo; ka inkhawm ve peih lo kan ti anih chuan keimahni lam kan in enfiah a hun hle a ni zawk ang. 

Hun engemaw chen liam ta atang khan Mizoramah Kohhran huang pawna rawngbawlna hi a rawn lar chho a; a bikin thalaiten an bawh a; an lawm hle tih kan hria a. A pawng a pui a demna tur lam rawn ziak ka tum a ni lova. Mi ten thlarau purchaw an dawnna hmun leh chhandamna an channa hmun anih phei chuan a hlu hle ang. Engvanga hetianga kohhran pawnlam rawngbawlna hi thalai ten pan zawk nge an nih tih te pawh zirchian tham a awm thei ang a. Tin, tawng huatthu suh ah; hetianga inhmang te hian kohhran an bel tam lo; kohhran an hlat zawk tlangpui tih te hi a dik anih ngai chuan a chhan a awm thei ngeiin a rinawm. Hnualsuat ngawt lova; an chanchin Biak In a  inkhawm nuam lo tih rukna te an lo nei em tih te hi kohhran mite chuan kan ngaihsak dan tur pawh a ni ang. Kohhran chuan a huntawng mil zelin, a insiamremin; a bik takin thalaite rawngbawlna atan hian a inhawn zau zia chu Biak In chhung mai ni lo; Biak In pawna rawngbawlna hrang hrang te hian a tichiang awm e. Kohhran hi thil sakhal tak; a boruak tawna insiamrem thei lo emaw khirkhan tak zawng a ni lo tih hi hman leh tun rawngbawlna hian a rawn nemnghet zel zawk a ni.

Kohhran chuan tu te pawh min lo lawmin; kan tan kawng zau tak min hawnsak a ni. Mi thenkhatte chuan kohhran hi khirhkhan lutuk emaw a kan ruat thin hi a dik tawk lo niin ka hria. Kohhran hian a tul hunah chuan a zim tih chang pawh awm thei a ni tho awm e. Kohhran atanga chhuahna leh ho hran neihna hi a tirah vung a chhuah phut ngai lemlo va; zawi zawi in koh-hran atanga inla hrang zawngin an che thin tih hun kal tawha kohhran chanchinah a chiang mai a. Chuvangin; kohhran hian indaidan chin emaw inven chin hi a neih hi a tul tak meuh meuh reng a ni. Mizote tana Kohhran hlutna hi kan sawi bang thei lovang.