Laldenga MNF Founder President leh RD Pradan Home Secretary Govt. of India ten Mizoram remna Accord an sign June ni 30, 1986 champha vawi 28-na kan lo thleng leh ta a. With work Rajiv Gandhi tih RD Pradan-in a ziakah khan Mizoram Accord siam tura Laldenga nena an inbiakna chungchang a sawiah Mizoram leh hnam tana Laldenga’n tan a khawh nasatzia leh remhre taka amah betute a nawr thiamzia a sawina te a chuang a. India sorkar hnuaia a hnathawh hun tawp ber June 30, 1986 a nih thu te, sorkar hna a thawh chhunga a thil chhuan ber tur Mizoram Accord siama Laldenga nen remna thu an sign thei chu a dam chhunga mellung pawimawh bera ngaih thu a ziak lang nghe nghe a ni. MNF khan engvanga Independence puang nge an nih? (a) Mizote hi hmakhawsang atangin India mi kan ni ngai lova, thlahtu bul te pawh Aryan emaw, Dravidian emaw a ni lova, Mongolian thlah kan ni. Khaw tinah Lal hrang hrang neiin tuma awp lovin zalenna pumhlum neiin kan awm thin. (b) Kum zabi 19 tawp dawn 1890 atangin British-ten an ralthuam neih that leh fin zawkna te avangin kan lalte hnehin min awp ta a ni. (c) British-in min awp pawhin India mi kan ni lo tih an hria a. Govt. of India Act 1935-ah pawh Excluded Area (huam tel ve loh ram) tiin British lal aiawhin Assam Governor General-in Council kaltlangin Suptt of Lushai Hills tiin min awp a ni. (d) India Independence duan 1947 laia India Constitution siam dawn lai pawhin Mizote aiawh pakhatmah an tel ve lova. India Constitution pawh hi MNF chuan Barhluih Constitution a ti reng a ni. India Independence hma ni, Aug. 14, 1947 khan Aizawl-a (Accrideted Leaders) Mizo Union, Zalen Pawl, Lal aiawhte, Kohhran aiawh, Hmeichhe Pawl, Sorkar hnathawk leh Pension tawhte leh khawtlang mi langsar (Commoner) aiawh 50 te chu Aizawl Bawrhsap L.L.Peters-a hovin Mizoram awm zel dan tur an rel a: (i) India Independence Bill Sec-7, Sub.Sec-2-ah kan District (Lushai Hill/Mizoram) awm dan tur tihchian a ni ve lo va, tun dinhmunah hian Pakistan emaw, Burma emaw zawm phalsak thei kan ni em tih Governor-in ziak ngeiin min hrilh chiang thei se. (ii) Lushai-ho chu Indian Union zawm ve tur a nih chuan, an thil phut lian ber berte tihchian a ni ve lo va, tun dinhmunah hian Pakistan emaw, Burma emaw zawm phalsak thei kan ni em tih Governor-in ziak ngeiin min hrilh chiang thei se. (iii) Lushai-ho chu Indian Union zawm ve tur a nih chuan an thil phut lian ber ber chu an Customary Law leh ram nih dan phung pangngai chhawm zel, Chin Hills Regulation 1896, Bengal Eastern Frontiers Regulation 1896 leh Bengal Eastern Frontiers Regulations, 1873 -te anmahni Lushai-hovin hlih theih tawh a ni e an tih hma loh chu hman zel tur a ni ang. (iv) Lushai-hote chu an duh phawt chuan a rei lo berah kum 10 hnuah, Inian Union atanga an inlak hran phalsak an ni tur a ni. (Heta atanga thil chiang tak chu India Independence Act 1947-ah khan India hnuaia tel ve lo, Princely State 500 vel lai India-a lakluh luih an nih ang thovin Mizote hi India-ah min telh luihtir a ni) (v) Kan hruaitu hmasaten India an zawm dawna an lo rel tawh ang ngei hian, India Independence atanga kum 10 ral hnu, 1966-ah Mizoten Zalenna kan neih leh hi kan Dikna leh Chanpual dik tak a ni. (vi) “Kum sawm hnuah” tih thuah hian tunhnua kan thu hriat thar han zeh tel thain kan hria a. India-a Independence dawn laia Mizoram-a Political Party lian ber, Mizo Uion hruaitute khan India rama tel chu Mizote tan tha ber turah an ngai a. Hemi atan nasa taka hma lain an hlawhtling ta kha a ni a. April 18, 1947-a Constituent Assembly Advisory Sub-Committee Member-ho lo zin hnena an thu (Memorandum) thehluh ah chuan, thil dang bakah India Zalenna hnuaiah Assam zawm an remtih thu te, Mizoram-ah chuan India-a Cachar, Tripura leh Manipur-a Mizote leh an chenna ram bakah, Chittagong Hills Tract chhunga Mizo hnahthlak leh an chenna chinte (Mizo Integration) pawh telh ni se tih te, Mizoram khaw tinah Village Council din nise tihte an telh a. A tawp berah chuan, “Heng zawng zawng hi kum 10 hnuah siamthat leh theih a ni ang’ tiin thu delhkilh an lo siam a. An President Pu Khaw-tinkhuma leh Secretary Pu H. Vanthuama’n hming an ziak a ni. Mizo Union hian an phak tawkah ngaihtuahna fim tak an lo hmang ngei tih a lang chiang hle a ni. (vii) Heng, a chhan leh vang tha tak takte avang hian Zalenna hi Mizote- chanvo dik tak a ni a. Hemi tihlawhtling tur hian Mizo ai MNF hian an awh zo a ni. Assam Assembly-ah Mizo District seat 3 a nei ve a, heta seat 2 hi MNF-in a chang. Chuvangin MNF hi Mizo-te aiawhtu dik tak a ni. (1963-a MLA seat 2, Bye-Election) neihah Aizawl West Pu J.F. Manliana, MNF-in Pu H.K.Bawichhuaka, District Council Chairman leh Mizo Union President ni lai a hneh a. Lunglei bial ah Pu L.H.Lalmawia, MNF-in Pu Ch.Sap-rawnga CEM ni lai a hneh bawk a ni. Heng chhan hrang hrangte avang hian March 1, 1966 a lo thlen pawh khan MNF hruaitute khan Mizo mipuite aiawhtu dik tak niin, an tih tur dik tak tiah an inngai lo thei lo a ni. Kum a liam zel a, kankhawhawi pawh a zau ve zel a. MNF chuan heti ringawta kan awm chuan kan chhehvela hnam lian zawk ten min la chimpil mai dawn a. Mizote hi khawvela lang ve phak lovin kan pilbo mai dawn tih ngaihtuahna an nei chho zel a. India sorkar hnena kan dikna leh chanvo nei let leh tura tharum tel lova ngen ni se an ti ta a. Vawi tam tak tawngkam leh thute thawna Mizote dikna leh chanvo tur an sawipui lai mek chuan, chutianga hmalatu Pu Laldenga te chu manin Lung inah te an khung ta mai a. Pu Laldenga leh an thurualpuite chu man fai vek a, engmah sawi thei lova siam turin sipai tam tak Mizoram-ah tirhluh an tum thute an hriat chuan kut lukima lo tawrh mai chi a ni lo tih hriain. lohtheihlohna avangin an theih angin ralthuamte dap khawmin March ni 1966 -ah Mizoram Independence an puang ta a ni. India sipai chhuanvawr tha tha rawn tirlutin ralpui phiarin min rawn phiar ta a. Jetfighter-in kan khawpui Aizawl-te kapin an rawn bomb alh ta dur dur mai a ni. India sipai te chuan an thlen chin chinah a rawva thei ang berin an sawisa hlum a. Kan hmeichhiate an pawngsual a. Mizoram chu tah leh rumna in a khat tlat a ni. Mizo nih chu Criminal (sual nihna) a ni a. Political Party zawng zawng, Kohhran Pawl, NGO-te chuan an auh hla sak nawn reng chu REMNA LEH MUANNA tih ringawt mai a ni. Kum 1974 khan kohhran hruaitu Committee dinin India leh ramhnuaia rammu MNF hotute chu Remna zawnga inbe turin an tahawh takzet a. Kohhran, Party, NGO-te chuan, “Kan pasaltha rammute chuan Sai kap lovin, Sakhi pawh rawn hawn ula, lawm takin kan lo pawm ang a. A kaptu inah Salu chu kan tar ang” an ti a. January 1976-ah Pu Laldenga chu W.Germany atangin inbiakna nei turin Delhi a rawn lut ta a. Eng emaw chen inbiakna an neih hnuah 19th Feb. 1982-ah an inrem hleihtheih loh avangin inbiakna chu a tawp ta a. Pu Laldenga chu April 21, 1982-ah London panin a thlawk chhuak zui ta bawk a. Kum 1984 Mizoram Assembly Election inthlan dawnah phei chuan Mizoram Political Party zawng zawngte thupui ber chu Remna leh Muanna tih a ni ta zel a ni. Pu Laldenga Londona-a awm, malsawmna dawn tumin Mizo Convention Party (MC) leh Mizoram Pradesh Committee (MPCC)-te chu London-ah Pu Laldenga ‘Tape’ an zuk inlak chhawk a. MPCC President ‘Tape’ rawn hawn Mizoram dung tluan an fan puinaah chuan “Mizoram remna leh muanna a thlen theihna tur atan, ‘Ka Lalthutthleng kian turin minute khat pawh ka inngaihtuah lo ang a. Engpawh rawn hawn ula, lawm takin kan lo pawm ang. India lamah kan tang hauh lo vang” tiin a intiamna thute a rawn tel ta a. Hei vang hian MPCC chuan hneh takin Mizoram Assembly Mizoram Assembly inthlanna 1984-ah hnehna an chang ta reng a ni. Hetihlai hian Mizoram tana rammu mekte chuan Remna atana inbiak zel chu an duh lo hle a. Mahse, Pu Laldenga ngeiin, “Kan indona hi kum 10 pawh a la ni thei, kum 50 pawh a la ni thei, kan thawh chhan ber Mizoram leh a mipuite hi kan chhanchhuak mai tur chuan tharumin kan hneh si lo va. Tunah India sipai Booth hnuaia rahhrualin an awm mek a. Kan beihchhan ber Mizo mipuite hi Mizo tihtlak pawh awm lo khawpin lo awm ta se, eng nge kan thawhin awmzia a neih ang. He Remna hi kan tawp hlenna tur a ni lo va, leirem rapa a bul kan tanna tur chauh a la ni. Politics-ah fullstop a awm thei lo,” tia a hrilhfiah hnuah Hnam Sipaite pawhin dik an ti ve leh thei ta a ni. Amah Pu Laldenga ngeiin, “He Remna hi kan duhthusam a ni lo va. India sorkar duhthusam pawh a ni hek lo. Mizo mipuiin remna in duh tawh si a. Mizo anga kan damkhawchhuah theihna tur te thei ber nia kan hriatah kan rawn sirtlukpui ta a ni. He remna hi Mizo ten a rah kan seng a, kan chawlhhlenna tur a ni lova. A bultanna leh kan hahchawlhna rahbi hmasa mai a ni tih inhriat ka duh ngawt mai,” a ti a nih kha. August 5, 1986 kan J.C.Ranga Reddy MP (RS) chuan Parliament-ah ti hian a sawi a, “Mizote hian kum 20 chhung kan hmelmate hnen atangin ralthuam an la khawm a, kan mi leh sa tam tak an that a. Kashmir tan special provision Article 370 kan siamsak a. Kum 40 chhunga ramin kan buaipui zuizia hi in hre vek ang. Chu aia tha lo zawk daih Mizoram Accord kan siamsak leh hi hna zawng tur emaw, khualpang zin tur pawhin ram danga zin tur ang maia Permit ngai a ni te hi foreign state insiam a ni lawm ni? Article 371 (G)-na hnuaiah an ram inches khat pawh an Assembly remtihna tel lova, a lei pawh kan lei theih lohna ram hi India ram state-ah in la ngai thei maw? Central sorkar hi Laldenga lakah a thingthi a ni lawm ni?” tiin a sawi chhuak hial a ni. Accord-a Ram neitu nihna leh a inhlanchhawnna thua a neitu nihna kan neih te, ILP tel lova Non-Tribal lo zin pawh a theih loh tlatna te hi chhut chiang ila, Pu Laldenga te finna maiin a phak lova. Mizoram mipuite tawngtai rahchhuah a ni tih hriat theuh a tul hle a ni. June 30, 1986 zankhuaa Mizoram hmun tin maia nula tlangval hlim lawma lam tlaivar hun te kha chhui kir ila, Remna leh Muanna hnuaia awm nawmzia leh tanrual a pawimawhzia hi i hre thar leh theuh ang u. Mizoram mipui zawng zawng REMNA CHIBAI ka buk a che u. - Zosangliana (Zotea)