Fuih leh nawr kal chawp ngai tawh lo ang hial tur khawpa Indian football-a tawng sang tawh, Lallianzuala Chhangte hi mi tam takin Mizote leh Mizoram tihmingthaa kal zel turin duhsakna hlanin an fuih tawh thin a, tunah chuan amah ngei a intiam thar ve leh ta.

India ram mihring vaibelchhe tel zinga kum 2022-23 chhunga ball pet thiam bera thlan, All India Football Federation (AIFF) Senior Men’s Player of the Year Lza Chhangte hi Nilaini zan khan Mizoram Football Association (MFA) chuan Hyve Aizawl City Hall-ah chawimawina hun an buatsaih a, he hunah hian a lawmzia sawiin Mizote tihmingthatu ni zel tura theihtawp chhuah turin a intiam.

“Tun tum ka lo haw hi ka lo thlen phatah MFA-in ropui takin min lo hmuak a, thlawhna tumhmunah banner leh pangpar nen min lo dawngsawng a. Zaninah hetiang hun min buatsaihsak lehzel bawk a, ka lawmzia sawi ngaihna pawh ka hre lo,” a ti a. “Hetiang taka ropuia min chawimawina hi ka lawm a; chuvangin, thalaite tana entawn tlak, Mizoram tihmingthaa MFA tana hma la zel turin theihtawp ka chhuah zel ang tih ka intiam a ni,” a ti.

Mizorama chawlhkar khat chauh châma Ningania a khelh mekna, Mumbai City-a season thar atana inbuatsaihnaa tel leh tura kal lehnghal tur, Zohnuai, Lunglei tlangval hian, “Mipui sing tam tak hmaah kan inkhel thin a, ka zâm ngai lo; fan an tam apiangin nuam ka ti a, ka phur phah thin a. Zanin erawh chu ka zam lek lek mai,” tiin a lawmzia leh amah chawimawinaa kalkhawmte a zah em avanga a zâm thu a sawi.

Mizo zinga AIFF Men's Player of the Year chawimawina dawng pahnih, Lza hnenah hian MFA bakah district football association pali - Aizawl, Serchhip, Siaha leh Champhai ten chawimawina leh lawmpuina an hlan a. United Sports Association of Mizoram (USAM)-in an hlan bawk.

Central YMA pawhin Lza chu a football zinkawng leh a nun kawngah tawlh lova a kal zel theih nana duhsakna hlanin an pawl president, R.Lalngheta'n tawlhloh puan a bahtir a ni.

Mizoram mai ni lo, India player chhuanvawr ni mek hi kar kal ta Thawhlehnia Bengaluru, Karnataka-a AIFF General Body Meeting chuan season liam ta chhunga India rama football khel thiam ber, AIFF Senior Men’s Footballer of the Year-ah a thlang a ni.

Lza hi Mizoram Premier League Season 3 play off-a Lunglei FC tana rawlthar mai a nih laia a inlan atanga Mizoram football khawvela hriat tan a ni a. Season hman zawh chiahah a che tha a, a chet dan enin India rama player tha bera thlan hi a phu hle.

Mumbai City leh ram tan inelna hrang hrang vawi 46 a inlan a, goal 21 thunin a thiante thun tur vawi 10 a siamsak bawk.

Team tan Hero Indian Super League (ISL) Shield a pet chhuak a. India ram tan Hero Intercontinental Cup hlawh chhuakin final-a Lebanon an hneh tumin Player of the Match atan thlan a ni a. Kar hmasaa SAFF Championship final-ah penalty petah Kuwait hnehin hun pangngaia 1-1 a an inhnehtawkna goal a thun bawk.

ISL-ah hian player tha ber nihna hauhvin Golden Ball a dawng a, Durand Cup-ah pawh hetiang tho hi a dawng a. Tun hnaiah Footballer Players Association of India (FPAI) Indian Player of the Year atan thlan a ni zui a, a aia hlu, AIFF Player of the Year atan thlan a ni leh ta bawk a ni.

Mizo tlangval hi Mizoram pana a lo haw dawn pawhin Kolkata thlawhna tumhmunah thlawhna khalhtu kaihhruainain chawimawina leh lawmpuina hun hman a ni bawk a. AIFF Player of the Year a nih thu leh SAFF-a India champion-puitu a nih thu uar takin flight attendant-in a puang a, thlawhnaa chuangten uar takin lawmpuina kut an bensak a ni.

Lza hma hian kum 2016 khan Jeje Lalpekhlua chuan Chennaiyin FC tana a khelh laiin AIFF Player of the Year chawimawina hi a lo dawng tawh a. Hemi tum pawh hian MFA hian lawmpuina leh chawimawina hun a lo buatsaih tawh bawk a ni.

Nilaini zana MFA buatsaih hun hmanah hian Hmingthansanga, Executive Committee Member, MFA chuan Lza chanchin a sawi a. Lal Thanzara, President, MFA-in thu a sawi bawk.