Mizoten hmasawnna an duh takmeuh em? Nimin piah mai khan UN Mission Team chuan Mizoram tlawhin, India hmarchhak states (NE States) ah te UNO in hmalakna hrang hrang a neih tan mek thu leh, Mizoram bik erawh chu a sorkar leh mipui an inhawngin NLUP Programme tha tak duan a nih avangin, thil chi hnih khat leka state danga hma an lak ang ni lovin, an hmalakna chi hrang hrangte kalpui vek an tum thu leh ram leh leilung tichhe lova eizawnna ngelnghet siam turin hma an lakpui vat tur thu leh kumin chhung ngeia tan a nih a beisei thu an sawi a ni. Ei leh bar, zirna leh hmasawnna kawng hrang hranga Mizoram dinhmun hian nasa taka hmasawn a la mamawh a, chumi thleng tur chuan thiamna leh finna, hmanraw tha leh remhriatna piah lamah, rilru chhungril atanga hmasawn duhna tak tak thinlung neih a tul a. Politics thila tute emaw inhmangaihsiakna ringawt ni lo, mirethei leh chhumchhia zawkte leh rim taka kuthnathawka eizawng, loneitute leh inhlawhfate atanga hma lak chhoh a tul a. Chutiang mite khaichhuaka, hma sawn se, ram ei leh bar dinhmun thang zel se tih hi ram hruaitute chauh ni lo, a tak taka thawktu sorkar hnathawkte hi an pianthar tel ve a tul hle a ni. Mizoram hian vanneihna tamtak a nei a, sik leh sa thu ah te, leihnuai hausakna chungchangah te leh thil dang tamtakah hausakpui tham ro a nei a, chumi haichhuak tur chuan rilru thianghlim leh dik, ram hmangaihna tak tak nena thawktu an awm a tul. Project lian leh Industry ropui tak takte awm thliah thluah mah sela, chutiang chu mipui, a bikin kuthnathawktute'n an chhawr tangkai tak tak si loh chuan mite leh milian inkar daidanna bang tihzauhna ang chauh a ni dawn a, chuvangin, ram hruaitute leh sorkar hnathawk mai ni lo, mipui nawlpui, kuthnathawktute pawhin mahni leh ram tan an thawk a ni tih an hriat tel a ngai a, chutiang rilru pu chunga taima leh rinawm tak, chhel tak leh huai taka thawh inhuam a ngai a ni. Nimin piah maia UN mithiam lokalte pawh hi a thawm thangva vel maiah a ral ang tih a hlauhawm hle. Mizoram tana hmasawnna thlen theihna tur an tuipui ang hian, a chhunga chengte hian tha taka lo tawiawm hi an bat, an kova innghat tih an hriat a, zir belh ngai awm apiang taima taka zir hreh loh a tul ang a. Mizoram mipui leh sorkar hian puih tlakin, puih phurawm takin an thawk em, an tuipui takzet em, thawhpui tlak an ni tak tak em, hmasawn an duh tak tak em, intodelh tura ke pen kawngah harsatna awm thei tamtak te paltlang an inhuam takmeuh em tihte hi an rilru-ah a riak ngeiin a rinawm. Mithiamte chu an inhuam viau a ni thei a, mahse, an thawhpui turte hian an rilru a tibeidawng mai ang tih a hlauhawm thin! Reilote-a sum leh pai tamtak ruh lawih mai, 'thatchhe arbawm khai' an tih ang maia, hlawhtling nghal vut vut duhna leh tumna rilru te hi hmasawnna hmelma a ni tih hriat a ngai a. Khawi lai emaw atanga sum hmuhna remchang lo zawn mai ang chi te pawh paihbo a tul bawk ang. Heng UN mithiam lokalte leh Mizoram puih chak tute hnenah hian, puih chakawm, phurawm, rintlak, dikna tan ngam, hmasawnna duh tak tak mi an ni tih an hriat theih nan Mizo mipuite inbuatsaih a hun takzet a ni.