ZALEN Aizawl 9, 2025 : MJA General Headquarters hruaitute chuan vawiinchawhma dar 11 khan Larsap General (Dr.) Vijay Kumar Singh chu a chenna Raj Bhavan-ah hmuin, Defence Minister-a lehkha an thehluh bawhzui pui tur leh Mizo thalai tam zawk sipai-a an luh theihna tura hmalakpui turin an ngen bawk.

Inkawmnaah hian MJA hruaitute chuan, MJA member-te tan India sipai hmun pawimawh tlawh dilna Lok Sabha MP Richard Vanlalhmangaiha kaltlanga Union Defence Minister, Pu Rajnath Singh hnena an theh luh chu a hlawhtlin theih nan theihtawp-a bawhzui sak turin an ngen a. Larsap chuan an ngenna chu a hlawhtlin theih nan theihtawp-a lo bawhzuipui tur thu MJA hruaitute chu a lo hrilh a ni.

Inkawmnaah hian Mizo thalai tam zawk sipai-a an luh theih nan theihtawp chhuahpui tur te; Mizo Regiment din theih dan tur te; Mizorama Army Battalion leh Airforce Station din a nih theih dan turte sawi lan a ni a. Sipai Officer-ah Mizo thalai tam zawk an luh theih nan Chhingchhip-a Sainik School chu tha taka a kal a, a changtlun zel theih nan hmalak dan tur pawh sawi a ni a. 

Larsap chuan, Mizo thalai sipai-a tan tum zingah lehkha pawimawh nei famkim lo an awm thin chu harsatna pakhat a nih thu MJA hruaitute chu a lo hrilh a. Sipai-a tan tumte chu lehkha pawimawh hrang hrang Voters ID, Aadhar Card leh Ration Card-ah te hming inmil thlap nei thin turin a chah a ni.