December 16, 2023; Sports Miniser Lalnghinglova (Tetea) Hmar chuan, Minister nia thutiam a lak tawh avangin, media lama a tel zel a rem tawh tih lo tih sawiin, "A ziaktu ka ni thei rih dawn ta lo hi a lunglenthlak dawn hle in ka hria," a ti.

Vawiin a MJA General Headquarters in an member MLA/Minister a tlingte chawimawina hun an hmanah he thu hi sawiin, Lalnghinglova Hmar chuan, "Chanchinbumi ni lo ila tun dinhmun hi ka thleng kherin ka ring lo," tiin, "Media hi ka tan a hlu hle. Minister ni tura thutiam kan lak tawh avangin media lama tel zel a rem tawh rih lo a, chanchinbu khawvel ka chhuahsan a ngai rih dawn a, awm thiam a har dawn hle," a ti bawk. 

Department a enkawl zingah Excise & Narcotics a tel tih sawi bawkin, hmalakna tur leh thawh tur a tam hle dawnin a lang tih a sawi. "Tunlaiin ruihhlo a hluar tak zet a, ruihhlo hluar ber lai kan tawng mek a ni. Chuvangin, ruihhlo hi nasa taka do a ngai a, theihtawp chhuah a ngai dawn a, in mi finchhuah ka ngai hle dawn. Tha taka kan thawhho chhoh zel ka duh a, ka beisei a ni," Lalnghinglova Hmar chuan a ti.