Aizawl: MJA President Zonunsanga Khiangte chuan Zirtawpni khan MJA Champhai district-in Champhai Press Club-a Annual Conference vawi 31-na an hman chu khuallian niin a hmanpui a, DIPRO Champhai Dr. Lallawmkima Thangluah chu Uaptu a ni.
MJA khawmpui chawhma hun hi C.Lalhnunpuia, President chuan kaihhruaiin rorelna hun atan hman a ni a. Chawhnu inkhawm hi Vice President R.Lalfakawma chuan a kaihhruai a, thu sawiin MJA President Zonunsanga Khiangte chuan, “Journalist-te hian in zir reng kan ngai a, zalenna kan neihte hi fimkhur taka kan hman a ngai a ni,” a ti.
MJA President chuan journalist-te chu mipui leh sawrkar kalsual tur vengtu an ni tiin a tul hunah chuan huai tak leh dik taka an chet a ngai tih a sawi a. Journalist-te chu thu dik tak chauh chhuah tur an ni tih a sawi a. Mizoram chanchinbumite chu India rama journalist intelkhawm tha ber an ni tiin inpumkhatna vawngnung zel turin a chah bawk.