Aizawl: Mizoram Journalists' Association, Champhai District chuan Zirtawpni khan World Bank sum, vaibelchhe 137.14 senga kawngpui sial mek Champhai leh Zokhawthar inkar kawng an tlawh.

Champhai atanga Zokhawthar panna kawngpui, double lane a sial hna hi December 26, 2014 atangin World Bank sum hmangin Sheladia Associate Inc, USA enkawkawlna hnuaiah Tarmat Company Ltd. Mumbai in an thawk tan a, June 25, 2017 a thawh zawh tura ruahman a nih laiin vawi 6 an hnathawh zawh hun sawn a ni a, March ni 31 ah an hna hi thawh zawh vek an tum tih Project Manager, Debratra Hazarika chuan a sawi. Zirtawpni thleng khan contractor hnenah Rs.vaibelchhe  151.23 pekchhuah tawh niin tunah hian hna zawng zawng zaa 96.18 an thawk zo tawh niin an insawi a. Melbuk hnuai metre 160 vela thui laih hmabak tih loh chu kawngpui hi zawhfel tawh a ni.

Hun tiam chhunga an hna an thawh zawh theih loh chhan chanchinbu miten an zawhna chhangin Contractor-in Environmental leh Safety chungchang an ngaihthah avangin World Bank thuneitu ten June ni 29 atanga September, 2017 chhung hna an suspend a, Project-in a paltlang khua leh veng bakah mimal thenkhatin lungawi lohna an lan tir avangin, a tira duan telh loh Ministry of Textile duh danin Geo-Textile Material hman tel a ni chuan hun a duh a ni," a ti.