Aizawl: Kum 2013 a MLA atana thlan tlin, kumin MLA-a in-cadidate leh mi 32 zingah Chalfilh biala MNF ticket-a ding, Lalrinliana Sailo hausakna a pung nasa ber a, a thil neih punna hi 797% a ni. Association for Democratic Reforms-in Election Commission of India website-a candidate hrang hrang Affidavit thehluh atanga zirchianna an neihah INC party aiawha kum 2013 inthlanpuia Tuichang biala ding, Lalrinliana Sailo thil neih hi Rs. 36,01,219 a ni a, kum 2018-ah a thilneih hi Rs. 3,22,85,199 a ni a, a hausakna hi kum 5 chhungin Rs. 2,86,83,980 (797%)-in a pung a ni. Pahnihna chu INC ticket-a Aizawl South I bialtu MLA R.Vanlalvena a ni a, a thil neih hi 133%-in a pung a, kum 2013-ah nuai 29 neiin kum 2018-ah nuai 67 a nei a, a hausakna hi kum 5 chhungin nuai 38 a tling a ni. Pathumna chu Saiha bialtu K.Beichhua niin kum 5 chhungin a hausakna hi vaibelchhe 1 chuangin a pung a, a punna zat hi 129% a ni. MLA nilai zinga dingnawn mi 32 zingah hian candidate 28-te thilneih hi a pung vek a, hetih lai hian candidate 4-te erawh kum 2013 aiin an thil neih a tlem thung a. Kum 2013 phak lo zingah hian Zodintluanga Ralte, Dr. Ngurdingliana, Hiphei leh K.Sangthuama te an tel. Zodintluanga hian kum 2013-ah vaibelchhe 3 neiin 2018-ah vbc.2 a nei a, a hausakna hi -8%-in a hniam a, K.Sangthuama hian 2013-ah vbc.25 neiin 2018-ah chuan vbc.12 a nei a, -52%-in a tlahniam a, Hiphei-in 2013-ah vbc.4 neiin 2018-ah vbc.1 a nei a, a hausakna hi -52% in a tlahniam bawk a. Tlahniam nasa ber Dr.Ngurdingliana hian kum 2013-ah Rs.90,57,272 neiin 2018-ah chuan Rs. 30,64,054 a nei a, a hausakna hi Rs. 59,93,218 a kiamin a kiamna hi -66% a tling a ni. &&&&&